Katersuiniarnermi kalaallit suleqataasut
KNR-imi sulisut marluk Danmarkimi katersuiniarnersuup Danmarks Indsamling-ip aallakaatinneqarnera qanimut malinnaaffigaat paasisassarsiorlutik.
Aqqa Lynge nipilerisut mixer-iata tunuaniippoq, Mathias Davidsen assiliiviit arlaata tunuaniilluni, arfininngornermi unnukkut Tivolip tusarnaartitsisarfianit DR-ip aallakaatimmagu Danmarks Indsamling. Sulisut taakku malinnaanerat paasisassarsiornertut oqaatigineqarpoq tassanilu ilisimasat pigilikkat iluaqutigineqarsinnaapput siunissami annertuunik KNR aallakaatitassiortussaatillugu.
Aliikkusersuinersuaq aallakaatinneqartoq arfininngorneq januarip 24-iat kunngissakkunnit aamma najuuffigineqarpoq.
Nipilersortartut ilisimaneqarluartut arlallit Tivolip tusarnaartitsisarfiani appisimaarput. Tamakku ilagaat Sanne Salomonsen, Tim Christensen, Carpark North, Julie Berthelsen, Jan Gintberg aamma X-Factor Basim, qanittukkut Nuummukassamaartoq, kiisalu Lis Sørensen aliikkusersuisuullutik.
Katersuiniarnersuarmi aningaasat pissarsiarineqartut Afrika-mi ilaqatariinnut piitsunut tunngatitaapput.
Politiken.dk malillugu aatsaat taama amerlatigisunik katersuiniarnermi pissarsisoqarpoq 72 millioner krone-t katersorneqarsimammata.