Nuna tamakkerlugu pilersaarusiornissamik ujartuipput
Peqatigiiffiup Meeqqat Inuunerissut / Bedre Børneliv eqqasuutigaat Kalaallit Nunaata FN-ip Meeqqat Pisinnaatitaaffii pillugit isumaqatigiissut unioqqutitsinera pillugu nutaarsiassaq.
- Taamaattorli tamatumunnga ilutigitillugu pisariaqarsutut aamma ajunngitsutut isigaarput, kalaallit meeqqat piginnaatitaaffiisa nunarsuaq tamakkerlugu eqqumaffigineqarmata, peqatigiiffik allappoq.
- MIBB eqqasuutigivaa UNICEF-ip nalunaaruteqarnera, tassami oqaluttuarisaanermi takoreerparput politikerit kalaallit piumassuseqanngitsut kiisalu iliuuseqarnissamut nukissaqanngitsut, kalaallit meerartaasa inuuniarnermikkut atugarisaat iluarsiniassallugit. Danmarkip FN-ip meeqqat piginnaatitaaffii pillugit isumaqatigiissut atsiorsimammagu, maannakkorpiaq iliuuseqarnissaq danskit politikeriiniippoq, taakkulumi pinngitsoorsinnaanngillat UNICEF-ip nalunaaruteqarnera, Kalaallit Nunaanit FN-ip Meeqqat Pisinnaatitaaffii Pillugit Isumaqatigiissut unioqqutinneqartoq, sakkortuumik uparuassallugu.
Peqatigiiffik Meeqqat Inuunerissut / Bedre Børneliv kalaallit politikeriinut kaammattuivoq maannakkorpiaq iliuuseqaqqullugit, tamatumuunnakkut qulakkeerniarlugu meeqqat ajornartorsiutaat Kalaallit Nunaanni iluarsineqassasut, inunnit kalaallit meerartaasa atugarisaannik ilisimasaqartunit.
- Ajornartorsiutit aaqqinneqarnissaat pillugit Danmarkimik suleqateqarnissaq pitsaassaaq, kisianni taamaallaat suliassap ingerlanneqarnera taamaallaat maani nunami tunngaveqartinneqarpat.
- Kalaallit Nunaanni isumaginninnermik suliaqartut nalunaarutaasa, namminneq kajumissusertik tunngavigalugu suliniuteqartut imaluunni ilisimatuussutsikkut misissuinerni nalunaarusiat aqqutigalugit nipituumik suaartaaraluarnerup uagut poltikerigut tusaatissinnaasimanngilaat. Neriussaagut UNICEF aqqutigalugu nunarsuaq tamakkerlugu eqqumaffiginninnerup tamanna iluatsikkumaaraa, taamaattumik nalunaaruteqarnerat qujarupparput. Kalaallit Nunaat 1993-imi Meeqqat Pisinnaatitaaffii Pillugit Isumaqatigiissut malinniarlugit pisussaafigalugit akuersivoq. Taamaattumik meeqqat pisinnaatitaaffinik unioqqutitsineq soorunalimi kinguneqartariaqarpoq.
Nuna tamakkerlugu siumut pilersaarusiornissaq
- MIBB-ip maanna tikillugu ukioq ataaseq sinnerlugu Naalakkersuisunut piumasaqaatigisimavaa, illuatungiliuttut suleqatigalugit sivisuumik atuuttussamik nuna tamakkerlugu siumut pilersaarusiornissamik iliuusissanillu meeqqat inuusuttullu pillugit suliaqartoqarnissaa, kiisalu meeqqanut ambassadørimik pilersitsisoqarnissaa suliap pimoorussamik ingerlanneqarnissaanik qulakkeerisussamik.
- Meeqqanik maannakkut ikiorneqarnissaminnik pisariaqartitsisoqarpoq. Taakku pineqarput taakkulu kalaallit inuiaqatigiit sullittussaavaat, MIBB allappoq.