Akunnerni tallimani ujaasineq

Umiarsuarmi uuliamik assartuummi "Orasila"-mi inuttat toqusut, slangemik puttasartumik nunamut ikaarussiniartillutik kinngupput ajunaarlutillu.

Umiarsuaq uuliamik assartut "Orasila" Qaqortumit nal. akunneri 1-2 ungasitsigaluni ikkarlippoq, maannakkullu kaanngartinniarneqarpoq. (Asseq: M.H. Simonsen)

Tallimangormat ualisoq nalunaaqutaq 16.45 umiarsuup Saarlup, Qaqortup kujataaniittup, avataani kisaqqasup nalunaarutigaa slangemik puttasartumik ikaarussiniartoqartillugu umiatsiaaraq ikaarussissut, nunamiit 3-400 meterinik avasissuseqarluni, kingusoq angutillu marluk imaanut nakkarsimasut.

Angutit marluk ujaarineqalerput nalunaaquttallu akunneri tallimat qaangiuttut nanineqarput. Qaqinneqaramik marluullutik toqoreersimapput, Jess Mythu umiarsuaatileqatigiiffimmit tusagassiutinut attaveqartartoq nalunaarpoq.

Umiarsuup kitsani amuariarlugit Qaqortup tungaanut aallarpoq talinniassagamik, taamaani umiarsuup inuttai annilaarsimaqisut nakorsamik ikiorneqarniassammata, Qaqortumut ingerlaartillutik nalunaaquttap akunnerinik 1-2 ungasitsigilerlutillu umiarsuaq ikkarlippoq.

Immalerput

Umiarsuup amia qalleq putuvoq tankillu orfaanaveeqqutai siulliit immalerlutik, imaarsaanerli iluatsippoq. Sakkutuut imarsiortut umiarsuuat "Knud Rasmussen" aammattaaq politiit angallataat umiarsuup eqqaaniipput, inuillu navianartorsiunngillat.

Naatsorsuutigineqarpoq nalunaaqutaq 10.30 aamma 11.00 missaani ulinnissaa, taamaalippallu ulinneruttornerata nalaani umiarsuaq kaanngartinniarneqassasoq.

- Uagut tamatta assorsuaq inuttat marluk ajunaarnerat pillugu attortissimavugut - eqqarsaatigullu qimataasunut ingerlatippavut. Uagullu nalunngilarput Orasilami issimasut tamarmik assut tupassimasut - kiisalu nalunngilarput pisinnaasartik tamakkerlugu suleqatitik annaanniarsimagaluaraat.

- Neriuppunga ungasinngitsukkut umiarsuaq kaanngatinneqassasoq taamaalillutik umiarsuup inuttai umiarsualivissinniassammata, annilaarujussuarsimanermillu kingorna pisariaqartitaminnik ikiorneqarniassammata, umiasuaatilik Lars Simonsen oqaaseqaateqarpoq.

Umiarsuaatilik teknikimut, aningaasaqarnermut imaluunniit pissutsinut allanut tunngatillugu maannakkut oqaaseqarusunngikkallarpoq.

Umiasuaq umiarsuaatileqatigiinnik M.H. Simonsenikkunnik pigineqarpoq Svendborgimi angerlarsimaffeqarluni. Umiarsuaq uuliamik assartuuttavoq nutaaliaalluinnartoq 2006-imi sananeqarsimasoq qaleriinnik ameqarpoq aammalu qaleriinnik itsineqarluni. Umiarsuaq Polaroilip attartugaraa, nunaqarfiillu akornanni "clean petrol pruducts" orsussaq atoriaannaasut, assartortarlugit. Umiarsuup usigaa 1600 diesel (orsussaq) kiisalu jet-fuel (orsussaq silaannarmut akulerutiasoq).

Powered by Labrador CMS