Unnuk kulturisiorfik Taseralimmi iluatsilluarpoq

Unnuk kulturisiorfimmi ualikkulli Taseralik nuannisartunik inoqarlualaaginnavippoq.

Immikkut saqqummersitat peqatigiiffiit Qajaq aamma Qimussip, kiisalu Eva Mette Kleistip nammineq mersorlugit suliai atisat ammit qimusserutit amerlaqisunik takuniarneqarput. Café sassaalliutai tuttu suaasat aamma umimmap suppi nungulertorneqaqaat, akeqanngitsumillu kaffi thiiluunniit kaageralerlugu ingerlataavissoqalutik, pisortaq Juaaka Lyberth unnersiorpoq.

Akornisigut nipilersortunik aliikkusersuinerit ingerlapput. Supputaasartartoq Frederik Lange Juaaka guitaretoqaralugu aliikkusersuipput. Akeqanngitsumillu aaqqissuunnerit naggaserneqalermata Ivinnguaq Brandt Miki Eriksen Jensen peqatigalugu aliikkusersuimmata, Taseraliup paarlersua ulikkaarlualaavippoq.

Nipilersoqatigiit Qulleq Lena Johnsen erinarsortoralugu inersuarmi tusarnaartitsipput Peter Møller Lynge taalliai erinniaalu cd-ni sisamani Qulliup saqqummersisimaasaani nunatsinni nuannarineqarluartut atorlugit. Nipilersullammassuit tusarnaartitsineq nuannersumik misigisaqarfiutippaat, Nuka Absalonsen guitarimik ataasiakkaarinermut naleqqanngiusartoq, bassillammak Steen Olsen, tumerparpaartoq Karl Jørgen Enoksen, pattagiartartoq Arne Heilmann, Peter Møller rytmertoralugu, soorunalumi Lena erinarsortoq - atatsimoorlutik tusarnaariat 200-t sinneqalaartut, unnuk kulturisiorfik Taseralimmi Sisimiunilu naggaserlugu nunannisartitsivissorput, Juaaka lyberth oqaluttuarpoq