17-inik pisuusutut nalunaarutigissaaq
Suliassaq ullut qulit qaangiuppata Ålborgimi eqqartuussissutigineqalerpat sakkukitsumik pineqaatissiisoqarnissaa illersuisup neriuutigaa
Nukappiaraq 17-inik ukiulik Qaqortumi Illu Paarsivimmeersoq, 2007-imi upernakkut inissitaasimagallartilluni Ålborgmimi 85-inik ukiulimmik Gerda Møllerimik pinngitsaaliillunilu toqutsisimasoq qaammatini 17-ini utaqqereersimalluni kiisami januaarip 27-ianni eqqartuussaassaaq. Ålborgimi eqqartuussiviup septembarimi 2007-imiilli eqqartuussinissaq ullulersinnaajumallugu Retslægerådip oqaaseqaatissaa utaqqilersimavaa. Oqaaseqaat kiisami decemberip 10-anni tunniunneqarmat takuneqarsinnaavoq nukappiaraq pillarneqarsinnaasutut isigineqartoq. Tamanna tunngavigalugu nukappiaqqap illersuisuata Nocholas Symesip suliassap nassuerutitut eqqartuussissutigineqarnissa qinnutigisimavaa.
– Retslægerådip nukappiaraq pillarneqarsinnaasutut isigimmagu suliassap piaartumik eqqartuussissutigineqarnissaa qinnutiginikuuarput. Peqatigitillugulu suliassap nassuerutitut eqqartuussissutigineqarnissaa qinnutigalutigu. Taamaattumillu pineqaatissinneqarnissaa nalunngikkutsigu uppernarsaatit tamaasa misissorumallugit ulluni pingasuni eqqartuussisariaqassanngilagut. Taamaattumillu ulloq ataasiinnaq atorlugu eqqartuussisinnaassaagut, Nicholas Symes oqarpoq.
Nassuerutigineqartoq
17-inik ukiullip 2007-imi aasakkut, 15-inik ukioqarluni, tigusarineqaramili nassuerutigereerpaa nammineq arnaq 85-inik ukiulik pinngitsaalillugulu toqussimagini, Retslægerådilli oqaaseqaateqarnerata kingorna aatsaat suliassaq nassuerutitut eqqartuusissutigineqarsinnaalerpoq, Nicholas Symes oqarpoq. Taamaattumillu suliassaq nassuerutigineqartutut ingerlannassaaq.
Imaappa nukappiaraq pisuusutut imminut nalunaarutigissasoq?
– Aap. Taamaattumik pisuunersoq pisuunnginnersorluunniit pinnagu qanoq pillaatissinneqarnissaa pingaarnerutillugu sammineqassaaq, taannalu uagut pingaartikkumaneruarput.
Allaaserisap sinnera Sermitsiami nutaami atuaruk.