Kisermaassat ikilipput
Tele'p internetimik allatigullu kisermaassinera naalakkersuisut atorunnaarsippaat. Nuummi internetimik atuisut qaammatialunnguit qaangiuppata allamik qinigassaqalissapput.
Naalakkersuisut sisamanngornermi januaarip 22-anni Nuuk Skynet-ip Nuummi internetimut attavimmik trådløsiusumik pilersuisunngornissamik qinnuteqaataa akuersissutigaat.
- Naalakkersuisut anguniarpaat oqarasuaatikkut internetikkullu attaveqarnerup innuttaasunut ajornannginnerusumik aaqqissuunneqarnissaa. Tamanna aallaavigalugu Naalakkersuisut neriuutigaat taamatut alloriarneq illoqarfinni allani inuussutissarsiortunut atuisunullu iluaqutaasumik pilersitsisoqarnissaanut aallarnisaataajumaartoq, naalakkersuisut tusagassiuutinut nalunaarumminni allapput.
Oqarasuaatitigut aammalu oqarasuaatit atorlugit sullissinermi kisermaassisussaatitaaneq naalakkersuisut taamaalillutik annikilisippaat, taamaasilluni maannakkut oqarasuaatitigut attaveqarnerup ilaani unammilleqatigiinneq killilik eqqunneqarluni.
Sullissinermi periarfissat amerlinissaat kiisalu IT atorlugu attaveqaatit sukkaqisumik ineriartortut nittarsaassisuinik atuisut qinigassaasa amerlanerulernissaat siunertaavoq. Nuummi ikkuffeqanngitsumik internetikkut attaveqaat Nuuk Skynet-ip pilersissavaa ingerlatissallugulu.
Nuummi inuussutissarsiortut amerlasuut attaveqaammut atuilernissaat naatsorsuutigineqarpoq taamaasillunilu attaveqaatip aningaasalersorneranut tassuunakkut peqataallutik. Internetikkut attaveqaatit atuisunut akikinnerulernissaat matuma ammaappaa.
Attaveqaateqarnermi unammilleqatigiinnerup kingunerisaanik illut amerlanerusut internetimut attaveqalernerannik kinguneqarnissaa naatsorsuutigineqarpoq. Niuerfimmi Skynetip aamma Tele Greenlandip siuariartornissaat naatsorsuutigineqarpoq.