Misissuisussamik kommissioniliornissaq Juliane H.-p taperserpaa
- Irakimik tiguaanermik peqataanermi qallunaat naalakkersuisuisa nassuiaataat sumut tamaanga sammipput, Juliane Henningsen (IA) taamatut isumaqarpoq.
Irakip nunanit tamalaanit sakkuiarneqarneranik naalakkersuisut akuersaarsimanerannik peqataasimanerannillu misissuisoqarnissaanik Folketingimi partiit illua'tungiliuttut inatsisissatut siunnersuutaat Juliane Henningsenip (IA) tapersersorpaa.
Tamanna pivoq ippassaq Folketingip oqaluttarfiatigut.
Tassani ilaatigut Juliane H. oqarpoq Irakimi sorsunnermut peqataanermut qallunaat naalakkersuisuisa nassuiaataat sunut tamanut sammisut.
- Savalimmiut Kalaallit Nunaallu paatsuugassaanngitsumik akerliusimapput, taamaakkaluartorli pisortatigoortumik isigitinneqarpugut sorsunnermi peqataasutut. Tamatumunnga pissutaavoq tamatumani aalajangiisinnaassuseqarneq Danmarkimiimmat, Kalaallit Nunaanniinnani. Oqartussaaqatigiinnerup naammaginanngissusiata, taamanikkut Naalagaaffeqatigiit Kalaallit Nunaannut atortitaata, pakatsisittorujussuuvaatigut.
- Piffissami nutaajunerusumi sorsunnerit toqoraaffiunerpaat ilaanni ullumikkut Naalagaaffeqatigiit pisortatigoortumik akisussaaqataasutut inissisimapput. Sorsunnermi sakkutooqarnikkut kukkuluttorfiusorujussuarmi inunnillu naalliutsitsisorujussuarmi akisussaaqataavugut. Taamaattumik naalakkersuisut taamaallaat namminneq soqutigisariaqarpaat Danmarkip Irakimik tiguaanermi peqataanerani aalajangiinernik tamatumunnga tunngaviusunik paasisitsinermik pilersitsinissaq.