Dash-7 isumannaatsuuneq pissutigalugu utiinnartariaqartoq
Timmisartoq Kangerlussuarmiit Qaanaaliartoq ullaaq nal. 8.46 Kangerlussuarmut utertariaqarsimavoq, ikuallattuulernermut kalerrisaarut aallartimmat.
Annonse
Ilaasut Qaanaaliartut ullaaq aallaanngajavillutillu Kangerlussuarmut utertariaqarsimapput, timmisartumi ikuallattuulernermut kalerrisaarut aallarteriataarmat.
Timmisartoq siuaniit aquanut misissorluareerlugu teknikerit ikuallattuulernermut kalerrisaarutip aallarteriataarneranut pissutaasoq nassaarinngillat.
- Timmisartoq ajoqutinik ujaasiffigineqarpoq, ajoquteqarneranilli nassaartoqanngilaq. Aamma paasitinneqarsimavunga motooria aallartillugu misilinneqarsimasoq, taamaattumik suut tamarmik ajoquteqanngillat. Timmisartoq maannakkut nal 13.45 Qaanaamut aallareerpoq, teknikkikkut pisortaq Peter Bjerre Sermitsiaq.gl-imut paasissutissiivoq.