Ukioq manna atuaqatigiit pujortartanngitsut tassaapput 8.a
Nuummi Kangillinnguit atuarfianni 8. a Paarisap 2008-mi atuaqatigiinnik pujortarneq ajortunik unammisitsineranni ajugaapput
20.000 kroner. Taama amerlatigisunik ullup qeqqata missaani tunissuteqarfigineqarput Nuummi Kangillinnguit atuarfianni atuaqatigiit 8.a ukioq manna PAARISAmit atuaqatigiit pujortartanngitsutut toqqarneqartut
Atuaqatigiit qaammatini arlaqartuni pujortartarneq aallaavigalugu suliaqarsimapput. Ilaatigut misissorsimavaat pujortartarnerup kinguneri suunersut aamma pujortartartuunani allat pujortartut akornanniinnermi cigarettip pujuanik najuussuinerup kinguneri. Atuaqatigiit nalunaarusiartik allalluagaq tunniuppaat pujortartarnerlu pillugu aviisiliorlutik.
Akissarsiat 20.000 koruunit atuaqatigiit angalanerannut atorneqassapput, ilinniartitsisuat Paornánguak Berthelsen atuartitaminik tulluusimaaruteqartoq oqarpoq.
Unammisitsinerup aallartinnerani atuaqatigiit klassit 26-uagaluarput, klassilli tallimaannaat unammisitsinermi suliaminnik naliligassanik nassitsisimapput.
Aappaagu akissarsiassat 30.000 koruuniussapput.