Paamiut kommuneat inuulluaqquaat
Paamiuni kommunalbestyrelse naggataamik ataatsimeereersimalerpoq. Maanna Kommuneqarfik Sermersuumi ilaalissapput.
Paamiut kommune ukiuni 57-ini atuutereerluni kommuneqarfittut immikkut ingerlajunnaassaaq ukiortaamiit, Kommuneqarfik Sermersuumi ilaalissagamik Nuuk, Ivittuut, Tasiilaq aamma Ittoqqortoormiit peqatigalugit. Kommunalbestyrelse-mi ilaasortat assuutitik atorlugit naggataarutaasumik ataatsimiipput marlunngorneq decemberip 16-iat.
– Januarip aallaqqaataani 2009-mi silarsuaq allanngornavianngilaq-aasiit, kisianni eqqarsartaatsitsigut allanngoriartortussaavugut, tassami Kommuunerujussuarmi isorartoqisumi inuit qinigaat assigiingitsorujussuarnik tununliaqutaqarlutik sulilertussaapput, taama borgmester Lars Sørensen kommunalbestyrelse-mut oqaaseqarpoq.
– Inuutissarsiutit nutaat, kulturi assigiinngissitaartoq nukittoqqutigalugu suliniartussaavugut, taamaattumik neriuutigivara siunissami ajunngitsumik suliat tamakkua ajunngitsumik ingerlanneqarumaartut. Oqareernittuut Paamiut kommuniata ukiuni ingerlasuni angusimasai pingitsuunngivillutik taakkua ineriartorteqqittariaqarput aammalu arajutsinaveersaartariaqarlutik, Lars Sørensen oqarpoq.
– Tamanna pisariaqarpoq, tassami tamatta pitsaasumik atugassaqassagutta, taava aamma ataatsimoorluta sorsoqatigiittussaagatta, Lars Sørensen oqarpoq.
Taanna qinigaaffinni tallimani kommunalbestyrelse-mi ilaasortaasimavoq ukiullu aqqaneq marluk kingulliit borgmesteriulluni.