Juullimi tunissutisiaraat pinnguartarfik
Thule Air Base Qaanaap nunaqarfiini Savissivimmi Qeqertamilu pinnguartarfiliornialerpoq. Tassagooq juullimi tunissutaat.
Nunatsinni illoqarfiit avannarlersaat Qaanaaq juullip inuanit aamma Pituffimmi sakkutooqarfiup qullersaanit basecommander Thomas Peppard-imit tikeraarneqarpoq arfininngorneq decemberip 20-iat. Amerikamiut sakkutuuisa Pituffimmiittut Qaanaarmiunut juullimi pajuttarnerat qangali ileqquuvoq
Ukiormannali basecommander Thomas Peppard kissaateqarsimavoq Qaanaap nunaqarfiinut tunissuteqarumalluni taassumalu saniatigut aamma utoqqaat tunissuteqarfigerusussimallugit. Tamanna pillugu Qaanaami palasi Juaanna Platou attavigisimavaa.
Juullimi tunissutit aasamut aatsaat puiarneqarumaarput tassa nunaqarfiit Savissivik aamma Qeqertaq pinnguartarfittaartussanngormata, taama ilisimatitsivoq Rasmine Norman assinittaaq Sermitsiaq.gl-imut nassiussaqarsimasoq
Qaanaami utoqqaat illuaniittut juullimi tunissutisiaraat issiavik tagiartuutitalik.