Marloqiusamik pissusilersorneq
Isumaginninnermi siunnersortit qaffassarniarlutik ilinniaqqittut sunngiffimminni ilinniartassapput suliassallu pisariusorujussuit akissarsiaqarlutik freertitaanermikkut suliarisinnaanagit.
– Politikerit pikkorissaqqujuarpaatigut qaffassaqqujuarlutalu, taamaaliulerattali ilaatigut ilinniakkagut naammaginartumik ingerlassinnaajumallugit ullunik ilinniarfigisinnaasatsinnik pisariaqartitsinerput paasineqartanngilaq.
Karen D. Jensen Dina Dorphilu taamatut oqarput. Taakku Ilisimatusarfiup allaffissornermut isumaginninnermullu tunngasunut immikkoortoqarfia ukiarmi aqutsinerup ilaqutariinnillu siunnersuinerup tungaasigut qaffassarluni ilinniarnermik aallartitsimmat ilinniaqataalersimapput. Ilinniarneq ilaqutariinnut peqqinnermullu naalakkersuisoqarfiup akiligaa misiligutitut ingerlannerqarpoq.
Isumaginninnermi siunnersortit 19-it bachelorinngorniarlutik diplomuddannelsemik ingerlatsipput. Ilinniarneq ukioq ataaseq ilinniagassatut annertutigaaq, taamalu piffissaq tamakkerlugu ilinniarnertut suliaqarnartigaluni, ukiut marluk ingerlanneqartussaalluni.
– Ilinniarsimasanik qaffassaaniarluni ilinniaqqinnerit ulluinnarni suliat saniatigut ingerlanneqartartussaapput, isumaginninnermi pisortaq Vibeke Møller Jensen Nuup Kommuneani isumaginninnermi siunnersortinut arfineq marlunnut, ilinniakkaminik qaffassaaniarlutik ilinniaqqittunut akissuteqarluni allappoq. Kisianni taamaattoqanngilaq, Ilisimatusarfimmi allaffissornerup isumaginnerullu tungaasigut pikkorissaanermut immikkoortoqarfiani pisortaq Marie S. Pedersen oqarpoq.
– Ilinniagaqartorpassuit ilinniarnissaminnut pisariaqartitaminnik sulisitsisuminniit piffissaqartinneqartannginnerat ajornartorsiutaasorujussuuvoq. Ilinniarnerit, atuarnerit piareersarnerillu piffissap suliffiusup avataani sapaatillu akunnerisa naanerini ingerlanneqartarput, nalunaaquttallu akunneri taakku suliffittut isigineqarlutik afspadserernereqartartussaapput, tamannali sulisitsisut paasisanngilaat, Marie S. Pedersen oqarpoq.
– Isumaginninnermi siunnersortit inuit inuttut ajornartorsiutaannik suliaqartuugamik suliassaqartaqalutillu sakkortuunik piumaffigineqartarput. Ilinniarnerup nalaani ullualunnguanik piffissaqartitaanissamik piumasaqarneq ingasagineqarsinnaanngilaq, sulisitsisuttali akisarpaatigut »sulisoqarnermut politiki taamaaliornissamut periarfissaqartitsinngilaq« aamma »ilinniaqqittut allat aamma ullunik ilinniarfissanik tunineqarneq ajorput, Sara Abelsen oqarpoq. Isumaqarporli sulisoqarnermut politiki utoqqatsissutigissallugu akikippallaartoq.
– Erseqqilluinnarpoq kommunini politikerit nunatsinni politikerit ilinniaqqinnissamik kajumissaarinerat paasisimanngikkaat, kisianni sukkulluunniit piumasaqaatinut nutaanut naleqqussartoqarsinnaavoq, piumassuseq kisimi apeqqutaavoq, Sara Abelsen oqarpoq.