Ilaquttat qimallugit juulli
Ilinniagaqartorpassuit illoqarfimmi ilinniarfigisami juullisiortariaqartarput, nunatsinni angalanerup akisunerujussua pissutigalugu.
Miinannguaq Kristensen Upernavimmeersoq Ilisimatusarfimmi ilinniartoq aappani meeqqanilu Nuummi juullisiussapput.
- Ilaquttat ilagerusukkaluarlugit ornissinnaanagit, inuttut sakkortuumik misigisimanartarpoq, Miinannguaq Kristensen oqarpoq.
Inersimasut marluk meerarlu Nuummiit Upernavimmut uterlugulu 33.600 kr.-eerlutik aatsaat angalasinnaapput.
Upernavimmut aappani meerartillu angalassagaluarunik akissaqartinngilaat aningaaserivinnullu atorniarsinnaasimanngillat. ilinniartuulluni akilersoruminaassammata. Taamaammat ilinniarnerminnut atatillugu inigisaminni juullisiortariaqartarput.
- Allatuulli immitsinnut nuannaarsarniartarpugut. Ilaquttagut angajoqqaat allallu najunngikkaluarlugit, nammineq ilaqutariilersimasugut meerartaqarluta juullisiortarpugut. Miinannguaq Kristiansen.
Arlalinnik juullimi angerlarsinnaanngitsunik aamma nalunngisaqarpoq, nalunngilaalu taakku ilaquttatik kammalaatitillu kikkut juullisioqatigissanerlugit ujartortaraat.
Miinannguaq Kristensenip ilinniartut allat kajumissaarpai ilinniarnitik ingerlatiinnassagaat, ilaqartarmata angerlarserlutik ilinniakkaminnik unitsitsiinnartartunik.