Qaanaami ilaqutariit angerlarsimaffeeruttut
Naneruutit silami ikumatillugit puigukkat ikuallannermik pilersitsipput, ilaqutariillu illuat nunguilluni ikuallappoq.
Ilaqutariit juullip ullaavani iterput ini ikuallalersimasoq. Igalaakkut anipput annertunerusumillu ajoquseratik. Anaanaq putsumik ajoqusersoralugu napparsimmavimmi misissorneqarpoq, ataataq isikkamigut kilerluni. Meeqqat arfinilinnik, arfineq pingasunik, aqqaneq marlunnik 15-inilullu ukiullit ajoqusinngillat.
Qaanaami innuttaaqataasut ikiuutilertorput, ataasinnguinnartoq Lokalradio ikiorsiullugu katersuinialerlutik. Nalunaaqutaq sisamannguinnartoq 11.640 koruunit katersorneqareerput.
Ikiuiniartut oqaatigaat, aningaasat katersorneqartut saniatigut aamma siniffinnik, madrassinik, igaffimmi atortunik ilisivinnik, qullernik TV-mik kiisalu puusiarsuarnik 30-it sinneqartunik atisanik imaqartunik katersuisoqareertoq.
Ilaqutariit ikiorusukkaani kontomut uunga ikisisoqarsinnaavoq: 6471-1505960.