Paamiuni ikuallannersuaq

Paamiuni ikuallannersuaqarneratigut inissiat arfinilinniit qulingiluat tikillugit ajoquserneqarput.

Paamiuni qatserisartut 17-init blok R-imi ikuallannermik suli qamitereqqissaarput. Ikuallanneq annertooq ataasinngornermi ualikkut aallartippoq. Paamiuni qatserisartut pisortaata Eigil Knudsenip sermitsiaq.gl-imut ilisimatitsissutigaa, 2. salimi ikuallanneq 3. aamma 4. salimut sukkaqisumik siaruaassimasoq.

– Inuit arlallit putsumik annertuumik najuussuisimasutut pasitsaanneqarlutik napparsimmavimmukaassuunneqarsimapput. Ikuallanneq maanna unitsipparput, kisianni aamaartoqarsinnaaneranik qamitereqqissaarneq suli ingerlavoq. Ikuallanneq sukkaqisumik siaruaatilertorpoq, ikuallannermillu inissiat arfinilinniit qulingiluat tikillugit ajoquserput. Nalunaaqutaq 15.23 kalerrinneqaratta qatserisartut 17-init aggertissimavagut, Eigil Knudsen oqaluttuarpoq.

Paamiuni politiit ikuallannerup sumik peqquteqarsinnaaneranik ataasinngornermi ualikkut suli oqaaseqarsinnaasimanngillat. Ikuallannermut peqqutaasoq aalajangersarneqarsinnaalertinnagu ikuallannermi ajoqusikkat misissuiffigeqqaartariaqarput, tamannalu aatsaat marlunngornermi pisinnaassasoq politiit ilisimatitsissutigaat.

Ikuallanneq kissarnerujussuarmik pilersitsisimavoq, kissarneq sakkortungaarmat betoni arlaninni qupititersimavoq.

– Betonip aseqqukui tammigalersimapput. Ikuallaffiup eqqaa assersorparut, politiit aamma sulilluaqaat, Eigil Knudsen oqarpoq.

Powered by Labrador CMS