Kalaallit Nunaat kalaallinuinnaanngilaq
Naalakkersuisut iulittaasuata namminersulivinnissamut aqqutaa arlalinnik alloriarfissaqarpoq. Siullermik aatsitassanut tunngasut oqartussaaffigilertariaqarput, aamma nunanut allamiunut tunngasoq oqartussaaffigilertariaqarpoq, sulisussaaleqineq peqqutigalugu.
Kalaallit Nunaata assaat namminersornermut tamakkiisumut kajumissuseqartumik sanarfeqataarusuttut tamaasa atorfissaqartissavai. Taamak Hans Enoksen Naalakkersuisut Siulittaasuat ukiortaani ukiortaamut oqaalugiaammini oqarpoq:
- Avataaniit sulisussarsiortarnermut tunngassuteqartut kiisalu nunassittoqarsinnaaneranut tunngatillugu inatsisiliornerit piaartumik nunatsinniit akisussaaffigineqalernissaat sulissutiginiarparput. Taamaaliorniarpugut nunatsinni ukiuni aggersuni annertunerujartortumi sorpassuartigut sulisutigut amigaateqaranitta annertuseriarnissaa naatsorsuutigigatsigu. Avataaniit maanga tikillutik sulerusuttut qujarullugit tikilluaqqusariaqarpagut. Inuiaqatigiinni oqallinnerit malinnaaffigisuugaanni oqaatiginiarneqartarpunga nunarput kalaallinuinnaq sammitinniarsarisuugiga - kalaallisut oqalussinnaanngitsut atorfissaqartinngikkikka. Tamanna paatsoorneruvoq. Kikkut tamarmik maani sulerusuttut pisariaqartippagut, allamiullu maani sulerusuttut tikilluaqqullugit qujaruttariaqarpagut.
Hans Enoksenip aamma oqaatigaa namminersornermut ingerlanitsinni aatsitassanut tunngasut oqartussaaffigilernerinik aallartittariaqartoq, tamatuma kingorna inuussutissalerinermut inatsimmut tunngasut, kisianni aamma tamatta ataasiakkaarluta immitsinnut piumaffiginerunissarput pingaaruteqarpoq.
- Tamatta ataasiakkaarlut aperiarfissanik ineriartuutaasussanik ujartuinerusariaqalerpugut, ikiorneqarnissaq utaqqinagu. Inuiaqatigiinni ajornartorsiuterpassuaqarpoq aaqqittariaqartunik. Isornartorsiuinikkut oqaatigineqartarneri ajunngitsuuvoq, taamaaliornikkut ajornartorsiutit aaqqittariaqartut takusinnaalersinnaagatsigit.
Boksemi uani taperpia-tungaani ukiortaami oqalugiaat kalaallisut qallunaatullu downloadersinnaavat.