Airbusi Islandiliartinneqarpoq
Kangerlussuarmut mittarfiup quasarpallaarmat anorlerpallaarnerlunilu "Norsaq" Keflavikimut sanguinnarpoq.
Air Greenlandip Airbusia ”Norsaq” ullumi ataasinngornermi Kangerlussuarmut missinnaasimanngilaq, mittarfiup quasarpallaarnera peqqutigalugu. Mittarfillu miffiusinnaanngormat anori sakkortusivoq minnissaq periarfissaarullugu.
Taamaattumik timmisartorsuaq utiinnartariaqarpoq Islandimi Keflavikimut, ilaasullu 212-t tassani unnuissapput. Marlunngorpat ullaakkut Norsaq Kangerlussualiassaaq, Kangerlussuarmullu nal. 08.20 tikissalluni. Marlunngornermi ualikkuut Kangerlussuarmiit Nuummut immikkut ittumik pingasoriarluni timmisartuussisoqassaaq, ilaasullu Kalaallit Nunaata sinneranut ingerlasussat timmisartuussinissanut pilersaarutaareersunut nuunneqassapput. Nal. 09.45 Norsaq Kangerlussuarmiit Københavnimut aallassaaq, ilaasussat ullumi ataasinngornermi aallanngitsoortut ilaasoralugit.
Marlunngornermi nalinginnaasumik timmisartuussinissat GL781/782 Air Greenlandip Boeing 757-anik Kunuunnguamik ingerlanneqassapput.
Ullumilu Kangerlussuarmiit Nuummut ingerlasoq GL501 Kangerlussuarmut utertariaqarsimavoq Nuup eqqaani anorlerpallaarnera pissutigalgu, ullumilu ullup sinnera Nuummiit timmisartuussinissat tamarmik taamaatiinnarneqarput.