Meeqqerivinni nutarterineq aallartissinnaalerpoq
Meeqqerivitsialaap timitalernissaanut alloriartoqarpoq meeqqanut suli atualinngitsunut perorsaanikkut inerikkiartuutaasunik ulluunerani neqerooruteqartarneq pillugu peqqussutissaat nutaaq inatsisartut akuersissutigimmassuk.
2005-imiilli nuna tamakkerlugu ataatsimiisitsinerit assigiinngitsut ingerlanneqarput, tassanilu isumassarsiat siunissamilu ulluunerani neqeroorutit pillugit siunnersuutit katersorneqarput.
Suleqatigiissitat assigiinngitsut allanngortiterinermik suliallit pilersinneqarput, ilaatigut malittarisassat aamma perorsaanermi ilinniarnerit maannamut atuuttut nalilersuiffigineqarlutik. Kommunini sisamani perorsaavinni misileraasoqarpoq ineriartortitsisoqarlunilu, tassanilu meeqqeriviit arfinillit peqataapput. Meeqqeriviit tamarmik angutserlugit pikkorissaasoqarlunilu ilinniartitseqqiisoqassaaq, Tusagassiivik nalunaarpoq.
Atuarfitsialammi suliat aallarteriikkat nangillugit Naalakkersuisooqatigiit ineriartortitsinermi ilinniartitaanermilu sutigut tamatigut suliat ataqatigiinnissaat kissaatigaat.
Assimi takuneqarsinnaapput suleqatigiissitat peqqussummik piareersaasut: Louise Amkjær (jurist, Rigsombudsmanden), Simon Lennert (seniorkonsulent, KANUKOKA), Tommy Marø (Landsstyremedlem), Maren A. Clasen (pædagogisk koordinator i Aasiaat Kommuniat), Agga Lund (projektmedarbejder i KIIIN), Naasunnguaq Bisgaard (PIP), Kunuunnguaq Fleischer (projektkoordinator i KIIIN), Kaalina Skifte (formand for PIP), Rie Johansen (pædagogisk konsulent i Ilulissat Kommuniat) og Hanne Eggert Petersen (børnehaveleder i Nuuk).