Nanu qallunaat TV-anni
Julie Berthelsen aamma Søs Fenger DR-p Aftenshowiani aliikkusersuipput meeqqanik inuusuttunillu suliniummut Nanumut erinarsuut tapersersuutaasoq atorlugu, Nanulu suliniuteqartumut Krissie Berthelsenimit ilisaritinneqarpoq.
Taassuma aallakaatitassiami nukippassuit tikkuarpai, maannakkut Kalaallit Nunaanni meeqqat inuusuttullu atugarisaannik suliniuteqartut.
- Nanu suliniuteqarfiit nutaat ilagaat naleqquttorujussuarmik suliniuteqartoq, aammattaarli allarpassuarnik pingaarutilinnik assigiinngitsunit suliniuteqartoqarpoq, Krissie Berthelsen oqarpoq.
- Kissaatigisarujussuara tassaavoq ileqqutoqqat, upperisat, politikkikkut inissisimaneri isummiutiinnakkallu akimorlugit suleqatigiinnissatsinnut pitsaanerulissasugut. Assigiinngisitsissagutta Kalaallit Nunaannilu isumaginninnermi isiginninnerit iluamik sunniuteqarfiginiassagutsigit immitsinnut uparuartoqattaarunnaartariaqarpugut allallu suleriaasaannik nalilersuiniarunnaarluta.
- Akerlianik pissutsit pitsaasut tamaasa, sumiiffippassuarni pisut, aallaavigissavagut. Ajornartorsiutit kisiisa samminiarpallaassanngilagut, aaqqinniassallutigilli ajugaanerit mikisut angisuullu, amerligaluttuinnartut, samminiarlugit. Kalaallit Nunaanni ikeqigatta pitsaanerusumik suleqatigiittariaqarpugut, tamannali piartulersoq aamma takusimavara.
- Qanittukkut namminersorneq pillugu taasisitsinermi qularnaatsumik angusaq isigaara suliassaqaffippassuarni nukinik nutaanik atuilernissamut aallartitsissutissatut pingaarutilittut. Nukiillu pigineqarput. Nammineq Nanumi siulersuisukka qiviaannarsinnaavakka, tassaasut arnat nukittulluartut, annertuumik eqqarsarnissaminnut qununngitsut, Nanup pilersitsisua tunniusimasoq oqaluttuarpoq.
Minutsialunnguit ingerlaneranni qallunaat TV-ata pitsaanerpaamik aallakaatitsisarfiani pingaarutilimmik nalunaajaateqarpoq, tassa Kalaallit Nunaanni isumaginninnikkut erloqinartunik ajornartorsiuteqartoqaraluartoq, sorpassuarnit annertuumik anguniagalimmillu suliniuteqartoqartoq. Nuna tamakkerlugu tunniusimasumik suliniuteqarluartut suliniutaat neriuuteqartitsilerput - aammalu siunissamut upperinnilersitsillutik.
Aftenshowimi ilanngussaq taanna naggaserlugu Julie Berthelsenip Søs Febngerillu erinarsugartik tusarnersoq "Godt igen" atorpaat. Erinarsuut Søs Fengerimit erinniarineqarsimasoq Juliemillu kalaallisut taallalerneqarsimasoq - erinarsortartullu taakkua marluk erinarsuut Nanumut tunniussimavaat.