Dronningi nunatsinni ilagiinnut atajunnaassaaq
Kalaallit Nunaata biskopiata kunngikkormiunit toqqarneqartarunnaarnissaanik siunnersuut amerlanerussuteqartut taperserpaat.
Kalaallit ilagiit qallunaallu kunngikkormiuisa akornanni attaveqarneq ajornartorsiorpoq, taamatut allappoq Kristeligt Dagblad.
Ullumikkut kalaallit biskopiat nutaaq Dronningimit toqqarneqartarpoq. Sapaatilli akunnerani kingullermi oqaluttuarisaanikkut pingaarutilimmik namminersornermut akuersisoqarnerata kingorna ilagiit nammineernerulernissaat aqqutissiuunneqarpoq, taamaasilluni Kalaallit Nunaata biskopia namminersortunngortussanit atorfinitsinneqartassalluni, ullumikkutuunngitsoq Danmarkimit kunngikkunnit aalajangersagaanngitsumik.
Siunnersuut naalakkersuisuni partiinit marlunnit, Atassummit Siumumillu, saqqummiunneqarpoq, ilimanarporlu politikkikkut amerlanerussuteqartoqassasoq, siunnersuut qularnanngitsumik upernaaru Inatsisartut ataatsimiinneranni oqaluuserineqalerpat.
Kalaallit Nunaata biskopiata Sofie Petersenip nassuerutigaa, siunnersuutip attaveqarfitoqqat nukittuut kalluarai, Kalaallit Nunaanni ilagiit iniuillu qallunaallu kunngikkormiuisa akornanni atuuttut.
- Isumaqarpunga Kalaallit Nunaata Danmarkillu akornanni qanimut attaveqarneq suli atuutissasoq, siunnersuu akuersissutigineqaraluarpalluunniit. Aaqqissuussinitoqqap attatiinnarnissaa kissaatiginarsinnaagaluarpoq, ilagiilli tamarmik namminersortunit tiguneqassammata pissusissamisoorpoq Kalaallit Nunaata biskopiata siunissami Namminersornerullutik Oqartussanit namminermit atorfinitsinneqartarnissaa, Sofie Petersen oqarpoq.
Taassuma erseqqissarpaa naalagaaffeqatigiinnermi attaveqarneq kipitinneqanngitsoq, pissutigalugu qallunaani ilagiinni Kalaallit Nunaat suli namminersortutut biskopeqarfiummat, namminiilivinnissamillu piumasaqarani.
- Attaveqarneq tamanna tamatumuuna attorneqassanngilaq, nalunaqaarli qaqugu tamanna pisinnaanersoq, Sofie Petersen oqarpoq.
Aasaq kingulleq savalimmiuni ilagiit qallunaanut ilagiinnut attaveqarnertik oqaluttuarisaanikkut pingaarutilik kipivaat, aamma nammineernerulernissamik kissaateqarnerup kingunerisaanik. Kalaallit Nunaanni ilagiit aallaqqaammut taamak sualutsigisumik iliussanngillat, takussutissatut pingaaruteqartorujussuusinnaagaluartoq qallunaat kunngikkormiuisa biskopinik toqqaanermi peqataasarunnaarnissaanik siunnersuuteqarneq.
Partiip liberaliusup Demokraatit ajornartorsiuteqarani naalakkersuisut siunnersuutaat tapersersinnaavaa. Partiili suli ingerlaqqikkusunneruvoq. Assersuutigalugu Kalaallit Nunaanni ilagiit nutaamik aaqqissuunneqarnissaannik naalakkersuisut siunnersuutaanni siunnersuutigineqanngilaq oqaluffik tassaaginnarunnaassasoq ilaginni biskopeqarfik.
- Ilagiit Kalaallit Nunaatalu namminersornissaannik oqallinneq tamaat isigalugu tamanna soqutiginartorujussuuvoq, kissaatiginartipparalu Kalaallit Nunaanni oqaluuserineqassasoq ilagiit Danmarkimit tamakkiisumik avissaarnissaat, Demokraatit sinnerlugit inatsisartunut ilaasortaq Palle Christiansen oqarpoq.