Kattuffiit suleqatigiinniarput

Kattuffiit Siunnersuisoqatigiiffiat, kattuffiit PIP, IMAK, PPK, AK, TP aamma ASG-ip sulisoqarnikkut ataatsimooqatigiiffiusoq ataatsimeersuartitsinissamik aaqqissuussivoq, tassani sulisartut peqatigiiffiinit 30-ineersut 50-it peqataaffigisaat, ilaatigut SIK.

Sulisartut peqatigiiffiisa mikisut amerlasuut aamma sulisartut kattuffiisa anginerusut akornanni qaninnerusumik suleqatigiinnissaq pisariaqartoq amerlanerusut isumaqatigiiissutigaat. Suleqatigiinnissaq qanoq aaqqissuunneqassanersoq maanna Kattuffiit Siunnersuisoqatigiiffiannit siunnersuusiorneqartussanngorpoq.

Nunani avannarlerni atorneqartoq sulisartut kattuffii ingerlatsiviit aallaavigalugit aaqqissuussaanerat ilinniartitsisut kattuffiata IMAK-ip pissanganartippaa.

- Ilaasortakitsunik peqatigiiffittut mikisutut avammut saqqummertarnata ingerlatat suuneri aallaavigalugit peqatigiiffiit katersorsinnaanissaat iluaqutaassagaluarpoq, assersuutigalugu ilinniartitsineq, isumaginninnerup peqqissutsillu iluani, niuerneq allaffissornerlu, il.il., taamak IMAK-ip siulittaasua Sivso Dorph oqarpoq.

Iluaqutaasinnaasutut tikkuarneqartut ilagaat isumaqatiginninniarnermut tunngasut. Sulisartut Kattuffii tamarmik Namminersornerusunut isumaqatiginninniartarput, taamalu mikisunut allalikkaanut aggulunnani angisoorsuulluni isumaqatigiinniarnernut illuatungiussalluni iluaqutaalluarsagaluaqaaq.

- Suleqatigeeriaatsit assigiinngitsut ilusilersorneqarnissaat suli suliassaavoq annertooq, kisianni tassa maannakkut peqataasunit tamanit annertuumik tapersersorneqarnitta kingorna aallartissinnaanngorpugut, Sivso Dorph oqarpoq.

Sulisartut kattuffiisa Siunersuisoqatigiiffianiipput sulisartut peqatigiiffii 25-it, amerlasuut kattuffinnut pingasunut angisuunut katersuussimasut, tassa AK (atorfillit), ASG (Akademikerit) aamma PPK (Peqqississaqarfinni sulisut).

Kalaallit Nunaanni suliffeqarfinni sulisartut 25.000-it sulisuupput.