Nanoq.gl amigaateqarpoq
Namminersornerullutik oqartussat nittartagaanni nanoq.gl-imi innuttaasunik sullissiviusussaagaluartumi sulisut telefuuniisa normui mailadressiilu takuneqarsinnaanngillat.
Namminersornerullutik oqartussat nittartagaat www.nanoq.gl Kalaallit Nunaanni nittartakkat anginersaasa ilagaat. Inatsisartut ataatsimiinneri, peqqussutit, inatsisit allallu naalakkersuisut Inatsisartullu aalajangiussaannut tunngasut suulluunniit tassani takuneqarsinnaapput. Taannalu nittartakkat Kalaallit Nunaanni avataanilu inuppassuarnit, minnerunngitsumillu Kalaallit Nunaanni tusagassiortunit, atorneqarluartartut ilagaat.
Suliassanut tunngatillugu tunulequtaasunik paasiniaanermi atorneqartarpoq. Paasissutissat pisariaqartitat nassaarineqarsinnaagajuttarput, naalakkersuisunili ilaasortamik, inatsisartuni ilaasortamik, atorfilimmik sulisumilluunniit allamik oqaloqateqarniaraanni paasissutissat amigaataasarput, telefuunit normui mailadressilu tassaniigunnaarsimammata.
– Ukiormanna aprilimi nutaamik nittartagartaarnikuuvugut, sulilli aqqi, telefuuniisa normui mailadressiilu ilanngunnikuunngilagut. Pisortaqarfiit naalakkersuisoqarfinngorlutillu aqutsisoqarfinngornerisa kingorna tamanna pisariusorujussuanngornikuummat, namminersornerullutik oqartussat paasissutissiisartuat Emma Kristensen oqarpoq.
Sermitsiaq nutaaq atuaruk.