Nuummi utoqqalinersiallit tapisiaat appassapput
Ukiuni 24-ni Nuummi utoqqalinersiallit inummut tapinik annertuallaanik tunineqartarsimapput. Januaarip aallaqqaataani allanngortoqassaaq.
Nuup Kommuniani isumaginninnermik immikkoortoqarfiup qanittukkut paasisimavaa Nuummi pensionisialippassuit 1984-imiilli inummut tapinik kukkusumik tunngavilimmik tunineqartarsimasut.
Kukkuneq paasineqarpoq kommunit kattunnissaannut piareersarnermut atatillugu.
- 1984-imi, kommunip aningaasaqarnikkut inissisimalluarnera tunuliaqutaralugu, kommunalbestyrelsi aalajangerpoq utoqqalinersialinnut inuttut tapit qaffanniarlugit, Namminersornerullutik Oqartussat atugassarisatut najoqqutassiaanik annertunerusumik. Taamaasilluni ukiuni 24-ni kukkusumik inummut tapinik tunniussaqartarsimavugut, politikerit, atorfillit kukkunersiuisulluunniit paasisimanngisaannik, borgmester Nikolaj Heinrich Nuup Kommuneata nittartagaanut, nuuk.gl-imut, oqarpoq.
2009-mi januarip aallaqqaataanit aningaasat allanngortinneqassapput, taamaasilluni Namminersornerullutik Oqartussat akiliutai malinneqalissallutik, taamaasilluni pensionisiallit, ullumikkut anginerusumik atugassaqartinneqartut, annikinnerusumik tunineqartalissallutik. Akerlianik utoqqalinersiallit, najoqqutassiamit annikinnerusumik atugassaqartinneqarsimasut, naatsorsuutigisinnaavaat atugassarisamik amerlinissaat.
Borgmester Nikolaj Heinrich, Kommuneqarfik Sermersuumi borgmesterinngortussaq Asii Chemnitz Narup utoqqaallu peqatigiiffiannit Qeersaamit aallartitat pingasut allannguutissat pillugit marlunngormat ataatsimeeqatigiipput.
- Illua´tungeriit tamarmik allannguutissat nuannarinngilaat, paasissaalluartumillu utoqqaat peqatigiiffiannut naalaaserlunnarpoq piviusunik saqqummiussivigineqarneq. Taamaakkaluartorli utoqqaat peqatigiiffiata paasisinnaavaa inatsisartut peqqussutaat tamatta malittariaqaripput, borgmester Nikolaj Heinrich ataatsimiinnerup kingorna oqarpoq.
Sermitsiaq tallimanngorpat atuaruk...