Piniartukkormiut meerartai katersissunneqartut
Kalaallit Illuanni Odense-miittumi juullernissaanut arfininngornermi niuffatitsisoqarmat meeqqat avinngarusimasuniittut aamma katersissunneqarput.
Kalaallit Illuutaat Odense-miittoq ukiumoortumik juullilernerani ullumi niuffatitsivoq. Pisarnertut soqutiginnittorpassuit takusaapput kalaalerpaluttunillu saqqummersinneqarsimasunik misissuillutik: atuakkat, nipilersuutit, pinnersaatit, ammit suliarineqarsimasut, allaffissiat aamma kalaallit juullilernerani niuffatitsinerani saqqummisinneqartut takuneqarsinnaasut allat misissorneqarput. Piffissap ingerlanerani ilaanneeriarluni akiliisarfiup eqqaani inuit akiliiniarlutik siuleriiaartarput.
Nerriviit eqqaanni kaffisuuttut oqallilluarput inuillu nuannisarlutik.
Kultureqarnermik paasissutissiisarnermillu sulialik Annette Lyberth Sermitsiaq.gl-imut oqarpoq, Kalaallit Illuat quligiluassaa juullilernerani taamatut niuffatitsisoq.
– Tusagassiutit aaqqissukkamik matumunnga soqutiginnilersinnssaat ajornakusoortorujussuusarpoq. Taama oqareeraluarlunga Kalaallit Illuutaannukartut amerlasoorpassuummata soorunami nuannaarpunga aamma amerlasuut orpiup ataanut ilisassaminnik kalaalerpaluttunik pisissallutik ussernartorsiorpasipput, Annette Lyberth Sermitsiaq.gl-mut taama oqarpoq.
Juullilernerani niuffatitsinermi peqatigiiffeerannguaq PROJEKT INUK aamma peqataavoq. Peqatigiiffiup taassuma avinngarusimasumiittut piniartukkormiut meerartaat aningaasanik katersissuppai. Peqatigiiffiup siulittaasua, Vittus Kalia oqarpoq peqatigiiffiup 64.000 koruunit ukioq kingulleq nunatsinnut nassiussimagai ukioq mannalu 40.000 koruunit nassiussimagai.