Nanu Søsimit Juliemillu malugitinneqarpoq
Meeqqanut inussuttunullu suliniaqatigiiffiup Nanup kunngeqarfimmit tamanit annertuumik soqutigineqarneq malugaat.
Meeqqanut inuusuttunullu suliniaqatigiiffimmi siulersuisuni ilaasortat arfinillit namminerlu kajumissutsiminnik sulisorpassuit Juliep aamma Søsip Aftenshow-imi Kalaallit Nunaanni meeqqat pigissaarnerulernissaat pillugu suliniut pillugu oqaluttuareersullu kingorna assorsuaq ulapissimapput.
Tamanna Ditte Hammekenip oqaluttuaraa, taassuma eqqoriarpaa suliniaqatigiiffik mail-it aqqutigalugit 100-t missaanniittunit saaffigineqarsimallutik.
– Assorsuaq ingerlalluarpoq. Inuinnarnit suliffeqarfinniillu suliniutitsinnut tapersersuisunit amerlasuunit saaffigineqartarpugut. Tassalu kunngeqarfimmit tamaniit. Tamatumunngalu peqqutaalluarunarpoq, Juliep Søsillu suliniut pillugu tv-mi oqaluttuarlutillu Nanup erinarsuutaa ilisarnaat atoramikku, Ditte Hammeken oqaluttuarpoq.
Nanu ilaatigut Hans Egedep Aqquserngani ataasinngornerit unnukkui allortarlugit tamanut ammasumik ammasarpoq, tassani juullerpalaartunut ilaasoqarsinnaallunilu attaveqaqatigiiffinnik nutaanik pilersitsisoqarsinnaalluni. Saniatigut Nanu aamma Nuummi allanik peqateqarnissamik pisariaqartitsisunut kikkunnulluunniit juullisiortitsiniarpoq. Tamanna decembarip 23-iani, 24-iani 25-ianilu ingerlanneqassaaq. Tassunga maannamut inuit 100-t peqataaniarlutik nalunaareersimasut Ditte Hammelenip ilisimatitsissutigaa.