Qeqertami ilaqutariinnut højskoli
Ilulissat avannaanni Qeqertami ilaqutariinnut højskoli ingerlanneqarmat peqataasut 18-iupput.
Ilaqutariinnut højskolip ilaatigut siunertaraa inuit ataasiaskkaat, aappariit ilaqutariillu nukittorsarnissaat. Qeqertamilu ilaqutariinnut højskolip ingerlanneqarnerani sapaatip akunneri marluk atorneqarput, tamannalu ingerlanneqarsinnaasimavoq Ilulissat kommuneani isumaginninnermut immikkoortoqarfiup pinaveersaartitsinermullu allaffiup immikkut ittumik aningaasaliissuteqarneratigut.
– Sapaatip akunnera siulleq atorparput ilaqutariinnik inuttut peqatigiilluta, tamatumanilu 90-it missaanniittut peqataapput, pinaveersaartitsinermut siunnersorti Helga Nielsen oqaluttuarpoq.
– Sapaatip akunnerata aappa atorneqarpoq angajoqqaat akisussaaffiinut pisussaaffiinullu, tamatumani ilaatigut sammineqarlutik perorsaaneq meeqqanullu maligassiuisuuneq. Tamatumani ilaatigut tikippavut meeqqanik isumassuinermik sumiginnaaneq aammalu meeqqat ikiorniarlugit oqartussaasut akuleruttarnerat, Helga Nielsen oqarpoq.
Ilaqutariinnut højskoli, sapaatip akunnerini 49-mi 50-imilu ingerlanneqartoq, naggaserlugu naliliisoqarpoq, tassani peqataasut inerniliillutik aaqqissuussineq tamanna iluatsilluarsimasoq.