Meeqqerivimmi tubekulose
Nuummi meeqqerivimmi "Timmiaaqqat"-ni sulisut meeqqallu tamarmik tuberkuloseqartoqarsinnaaneranik misissorneqalerput. Tamanna pivoq sulisut ilaat tunillajasumik tuberkuloseqartoq paasineqarmat, tunillaasimanissaali ilimanarpanngitsoq, Dronning Ingridip napparsimmavissuaq Sermitsiaq.gl-imut nalunaarpoq.
Nuup ilaani Qaparfiusaami meeqqerivimmi "Timmiaaqqat"-ni sulisut ilaat tuberkulose-mik tunillajasumik nappaateqalersimasoq paasineqarpoq. Tamanna pivoq sapaatip akunnera kingulleq.
– Maanna sulisut meeqqallu tamarmik SANA-mi misissortinnissamut aggersarneqalerput. Sapaatit akunnerini aggersuni misissuineq ingerlanniarparput, taama Sermitsiaq.gl-imut oqaluttuarpoq tuberkulose-mut peqqissaasoq Thomas Rendal.
– Erseqqissaatigiumavarput tunillaasimanissaanut periarfissaq annikitsuararsuummat. Tamatumunnga pissutaavoq napparsimalersoq ernerluni nalunaarmat tuberkulose-qarnini paasineqarniariartoq, taama Thomas Rendal oqarpoq.
Nappaatip ersiutai:
TB puanniikkajuppoq, aammali erlaviit arlallit eqqorsinnaallugit ersiutaasullu qanoq innerinut erlaviit sorliit eqqorneqarsimanersut apequttaasarpoq. Amerlanertigulli TB-mik napparsimasut sivisuumik kissarneqartarput, unnuami kiaguttarlutik, sanigortarlutik qasoqqalerlutillu. Puatsigut TB-qartut quersoqqajaasarput qitserartarlutillu. Meeqqat eqqarsaatigalugit qaratsap ameraasaatigut TB-qalerneq ulorianartuuvoq, taama allappoq Statens Serum Institut nittartakkamini.