Royal Greenland tunitsivinnik matusivoq

Royal Greenlandip tunitsivinnik siullermik Arctic Green Foodip ingerlassimasanik imminut akilersinnaanngitsumik ingerlatsisinnaannginneranut saarulliit ikippallaarneri aamma saarullit pitsaasusiisa appasippallaarneri pissutaapput. Taamaattumik Royal Greenland aalajangersimavoq Arctic Green Foodip tunitsivigisimasai Kangaatsiarmiittoq, Niaqornaarsummiittoq aamma Ikerasaarsummiittoq matuinniarlugit.

Royal Greenlandip 2007 tunitsiviit qulit KNI-mit Namminersornerullutik Oqartussanit tapiissutertaqanngitsumik tiguvai. Taakkuninnga marluk Sarfannguaniittoq aamma Itillimiittoq Sisimiut eqqaanni Sisimiut Fish ApS-imut attartortinneqarlutik ingerlanneqarput. Nuummi aamma Kangaamiuni tunitsiviit nunami maani tunisassanik tunisassiornertik ignerlatiinnassavaat.

Suliffeqarfissuup pisortaata Flemming Knudsenip nassuerutigaa tunitsiviit ingerlatiinnarnissaat suliffeqarfissuup iluatsissimanngikkaa. Royal Greenland tigusinerup kingorna 20 millioni koruuninik annaasaqarsimavoq, taamaattumillu suliffeqarfissuaq aalajangerpoq tunitsiviit ilaat matuniarlugit.

Royal Greenlandimit matusinermut patsisaaasunut ilaatinneqarpoq tunitsiviit tiguneranni tunisassiorfiit aserfallatsaalineqarsimanerat amigarsimasoq, kiisalu illut tunitsiviusut aserfallassimasut tamatumalu kingunerisaanik annertuumik aningaasartuutaasimallutik.

Kiisalu tunitsivinni sulinerup annertunersaa assaannarmik ingerlanneqarpoq tamannalu aningaasarsiatigut annertuumik aningaasartuutaalluni. Tunitsivinnut eqqorneqartunut aalisakkanik tunisisoqarsinnaajunnaassaaq 28. februaarip kingorna.

Arctic Green Foodip tunitsivigisimasai allat aamma eqqorneqassapput. Arsummut, Qeqertarsuatsiaanut aamma Atammimmut nipisat suaat kisimik tunisaalissapput, allat tamarmik 28. februaarip kingorna unitsinneqassallutik. Tamatuma kingorna tunitsiviit taamaallaat nipisat suaanik tuniniaanerup nalaani ammatinneqartassapput, nipisat suaat tunisaanerusarput apriilimit maajimut.