Sikukkut nakkartoq
Nuummi majuartaatip illiniliuutaa ataasinngormat ullaap tungani sikukkut nakkarpoq. Qujanartumik ajoqusertoqanngilaq.
Silap pissusiata allanngorarnera sorpassuartigut malugineqarsinnaavoq. Maanna Nuummi tatsimi Annersuarmi ingerlaarneq ulorianarsisimannguatsiarpoq, decemberimi tatsip sikua sisoraatinik oqilaniunnermut illiniliuummut atussaasariaqaraluarmat. Ukioq mannali taamaanngilaq, ataasinngormallu ullaap tungaani maskiina illiniliuut sikukkut nakkarpoq - qujanartumik itinngitsumi. Taamaattumik majuartaatip illiniliuutaata allap illiniliuut nakkarnikoq ajornartorsiutiginagu nusullugu qaqissinnaasimavaa.
– Annersuarmi sikumi arlaleriarluta qillerisimagaluarpugut siku atasinnaanersoq paasiniarlugu. Arlalinnili saanneqarsimagunarpoq, majuartaatip pisortaa Knud Chemnitz oqarpoq.
Piffissami kingullermi Nuummi sila allanngorarsimavoq, ilaatigut sialulimmik anorersuartarluni, kinguninngualu apilertarluni.
– Ukiup taamaasinerani tatsimi Annersuarmi sikumi maskiinap illiniliuutip ingerlannera ajornartorsiutaaneq ajoraluarpoq. Taamaakkunnaarsimannguatsiarpoq. Qujanartumik ingerlatitsisua maskiinalu ajoqusinngillat, maskiinap uuliaa taarsiinnarlugu atorneqaqqissinnaalissammat, Knud Chemnitz oqarpoq.