Hans Egedemut eqqaassutissap eqqaani kransiliineq
Ullumi ulloq tassaavoq Kalaallit Nunaata apostiliata ukiut 250-inngornerat
Domprovst Emma Balslev pingasunngornermi ullaap tungaa Nuummi Hans Egedep eqqaassutissaata eqqaanut kransiliivoq, palasip ajoqersuisullu Hans Egedes 5. november 1758-imi toquneranit ukiut 250-inngornerat malunnartinniarlugu.
Pingaartorsiornartumik biskop Sofie Petersen, domprovst Emma Balslev, illoqarfimmi palasit kiisalu ilagiit sinniisaat Nuummi Nunatta oqaluffissaarsuata eqqaaniittumut qaqannguamut eqqaassutissap bronzemik sanaap takorannersup eqqaanut katersuupput.
Peqataasut Carl Julius Spindlerip tussiusiaa Qutsavigaara Guutiga Ataataq aamma Henrik Lundip tussiusiaa Anersaakkut ulloq takorloorpara tussiarpaat.
Unnummut Emma Balslev eqqaaniaalluni naalagiaqatigiinnermi nalunaaqutaq 19.00 Nuummi Hans Egede oqaluffiani oqaluussissaaq, naalagissat kingorna oqaluffiup ilagiinnut inersuaani kaffillertoqassaaq.
Taamaalillutik Hans Egedep toquneranit ukiut 250-t qaangiunneranni Nuummi aaqqissuussinerit assigiinngitsut naammassineqarput, kisianni ullut Hans Egedemut tunngatinneqartut Stubbekøbingimi, ukiut kingulliit inuuffigisimasaani, sapaatit akunnerata naanerani nanginneqassapput.
Kiisalu marlunngorneq 11. novembari Århusip Universitetiani 'Center for multireligiøse studier ved Det teologiske Fakultet' -Upperisarsiornermik Ilisimatusarfimmi Qitiusumik upperisanik assigiinngitsunik sammisaqarfik- sammisaqartitsissapput taaguusersimasaminnik »Hans Egede og Grønland - før og nu« -Hans Egede aamma Kalaallit Nunaat - taamani maannakkullu-.