Amerlasuut sianeraluarput iluatsitsinatilli

KNR-ip Neriuffimmik katersuiniussinera iluatsippoq. Ataasinngormat kisitsisoqarmat katersuiniarnerup inerneraa 585.470 koruunik, Tele Greenlandimi pisortap tullia Anders Læsøe nalunaarpoq. Tele aamma Neriuffik peqatigalugit KNR-ip ukiunik 50-innogrtorsiornerminut atatillugu katersuiniarneq Ilimmarfimmi ingerlappaa.

Aningaasanik katersuiniarneq ingerlanneqarpoq assigiinngitsunik aliikkusersuisoqartiutigalugu tamakkununnga ilaapput Pele Møller Band erinarsortartorlu Ajaaja Gabrielsen, Piitannguaq Alaufesen aammattaaq Nordisk Koncertkor. Hans Jukku Noahsen aamma Arnakkuluk Kleist aliikkusersuinermi aqutsisuupput.

Aningaasarpassuit katersorneqarput naak oqarasuaatit atortui ajortikkaluartut katersuiniartullu namminneq oqarasuaatitik angallattakkat atortariaqarlugit.

Ilimmarfimmi Tele Greenlandip oqarasuaatit 30 ikkussorsimavai kiisalu Neriuffik ilisarisimaneqartunik arlalinnik aningaasanik katersuiniarnermi ikiuuttussanik aggersaasimavoq. Oqarasuaatit atortui tallimanngormat ualikkut misilinneqarput, taamaattumik suna tamarmi piareersimavoq KNR-ip nal. 20.00 aliikkusersuineq katersuiniarnerlu aallatimmagu.

Taamaakkaluartoq ajutoortoqarpoq. Inuit tusintilikkaat Nunatsinni tamaneersut oqarasuaatip normuanut tamanut saqqummiunneqarsimasumut 36 37 38-mut siarngupput, nuutsisarfilli ajutoorpoq.

- Oqartarnerattuut iluatsitsivallaarluta ipisoorpugut, Anders Læsøe oqarpoq.

Tusaamasat 30-t oqarasuaatit nipeqanngitsut saavani utaqqilussinnarlutik issiapput, sianernermi ajormata.

Aatsaat Telemit sianersinnaasut ikilineqarmata oqarasuaatit pingasut sianertalerput. Sianersimagaluartullu normui oqarasuaatit allagartalersuiffiatigut takuneqarsinnaammata katersuiniartut namminneq oqarasuaatitik angallattakkat atorlugit inunnut siarngutilerput.

Tamatumunnga ilutigitillugu KNR-TV-ikkut oqarasuaatit angallattakkat normui takutinneqarput, isiginnaartullu taakkununnga siarngutilerput Neriuffik aningaasanik tapiiffiginiarlugu.

- Taamaaliornikkut 1.126 anngupput taamaalillutillu Neriuffik tapiiffigisinnaallugu, Anders Læsøe ilisimatitsivoq.

- Kisianni qularisassaanngilaq amerlasuut sianeraluarsimassasut iluatsitsinatilli. Qassiusinnaaneri eqqoriarsinnaanngilara. Kisianni kisitsisit pigisatta takutippaat assorsuaq Kræftens Bekæmpelse-mut tapersersuinissaq soqutigineqarsimasoq, kiisalu aamma KNR-TV taamatut ittunik katersuiniartoqassatillugu tugassiutaasoq sakkortooq.

Ilisimatitsissutigaa Tele aamma Siemens, oqarasuaatinut nuussisarfimmik tunisisuusup maannakkorpiaq suna ajoqutaasimanersoq misissoraat, tulliani katersuiniartoqalerpat taamatut pisoqarnissaa pinngitsoorniarlugu.

Naak ataveqaatikkut ajutoortoqaraluartoq taamaattoq katersuiniarneq iluatsippoq. Tsnunamimut tunngatillugu februarimi 2005-imi katersuiniarneq taamatut ingerlanneqartoq oqarasuaatit aqqaneq marluk atorlugit 270.000 koruuninik isertitsiffiuvoq.

- Maannakkut amerlanerujussuit anngupput tamakkulu agguaqatigiissillugu Neriuffimmut amerlanerusunik tunisipput Tsnunamimut sanilliullugu, Anders Læsøe paasissutissiivoq.

Inuit tallimanngormat unnukkut anngutinngitsoortut, suli periarfissaqarput Neriuffik tapiiffigissallugu Grønlandsbankenimi konto normu: 6471-7698043 ikisiffigineqarsinnaavoq.