Naalakkersuisut siulittaasuat pisortartaarpoq
Aningaasaqarnermut nunanullu allanut naalakkersuisoqarfimmi pisortaq, Peter Schultz, naalakkersuisut siulittaasuata naalakkersuisoqarfiani decembarip aallaqqaataaniit pisortassatut naalakkersuisut ullumi atorfinitsippaat.
54-inik ukiulik Peter Schultz allaffimmiutut ilinniarsimasuuvoq, tamatumalu saniatigut København-ip Universitet-ianit inatsisilerituutut ilinniarnermi bachelor-iulluni maannalu inatsisilerituutut ilinniakkani naammassilerlugu. Taanna ukiorpaalunni pisortani atorfeqartuusimavoq, soorlu akileraartarnermut siunnersortitut (1987-1997) kiisalu Sulisoqarnermut Pisortaqarfimmi 1997-1998 aammalu 2004-mi pisortaalluni. Naalakkersuisut allattoqarfiani 2005-2007 pisortaanermut tullersortaalluni sulivoq. Kingullermik ukiup matuma aallartisimalernerani Peter Schultz aningaasaqarnermut nunanullu allanut naalakkersuisoqarfimmi pisortatut atorfinitsinneqarpoq.
Peter Schultz-ip atorfinitsinneqarnermini namminersornerullutik oqartussani ukiorpassuanngulersuni pisortaanerusimasoq Kaj Kleist paarlattussanngorpaa, taanna 30. november 2008 soraarninngorluni tunuartussanngormat. Kaj Kleist namminersornerullutik oqartussani 1992-imiilli pisortaanertut sulilerpoq. 1999-2001 nunanut allanut pisortaqarfimmi pisortaavoq. 2001-2003 inatsisartut siulittaasoqarfiani pisortaavoq, tamatuma kingorna namminersornerullutik oqartussani pisortaanertut atorfineqqippoq ukiormanna nutaamik atorfimmut atatillugu taaguuserneqarnermi tungaanut. Taamani naalakkersuisut siulittaasuata naalakkersuisoqarfiani pisortatut taaguuteqartinneqalerpoq.