Uppernarsaatit toqqortaatini nassaaraat

Thulemi sulisut qinngornernik ulorianartunik nappaateqalersimasut peqatigiiffiata Pituffiup eqqaani brintbombit sisamaqartt 1999-imiilli nalunngilaat. Maanna eqqortup saqqummernissaa neriuutigaarput, siulittaasoq Jens Zinglersen oqarpoq.

1968-imi aasakkut aqqartartuaraq Pituffiliartinneqarpoq immap naqqanut ujarleriartortillugu - nassaaqanngilarli.

Jens Zinglersen 1968-imi timmisartorsuaq B 52 sakkutooqarfiup eqqaani sikumut nakkarmat Thulebasemi sulisuusimavoq.

- Taamanikkut tamatta arlaannik soqarsimassasoq nalunngilarput, taamaanngippammi sooq aqqartartoq aasakkut sakkutooqarfimmukartillugu imaani ujaasitissavaat. Arlaannik ujaasisimassapput, Jens Zinglersen sermitsiaq.gl-imut oqarpoq.

Taamanikkut sulisut kalaallillu piniartut nakkarnerup kingorna saniilermikkut qinngornerit ulorianartut kingunerisaannik nappaateqalersimanerannik taarsiivigitinnissamik suliaqarnerup nalaani peqatigiiffik Washingtonimi toqqorsivimmi National Archivesip pappiaraataanik 1990-ikkunni takunnissinnaatitaalerpoq, taakkunani erserpoq qaartartorsuit sisamaqarsimasut, taannalu nassaarineqanngisaannarsimasoq.

- 2000-imi aggutsimi ilisimasagut tusagassiorfinnut nalunaarutigaavut, tamakkulu pisimasoq ulluni arlalinni oqaluttuaraat, kisianni tamakku pineranni ajoraluartumik russit aqqartartuat Kursk kivivoq, taamalu tusagassiorfiit uagutsinnik samminninnerat Kurskip alianaqisumik ajunaarneranut saatinneqarluni, Jens Zinglersen oqarpoq.

Pappiaqqat tuluit Radio aamma TV-qarfiata BBC-ip pissarsiarisinnaalersimasai tassaapput Zinglersenip peqatigiiffiatalu 90-ikkunni National Archivesimi nassaarisimasaat, taakkulu maanna neriuutigaat, eqqortoq maanna saqqummersinneqassasoq.

- BBC tusagassiorfittut tutsuiginarluinnartutut ilisimaneqarpoq, taamaattumik tusagassiorfiup taassumarpiaap pisimasoq sammeqqilermagu suliaq annertunerusumik sammineqaqqilissasoq neriuutigaarput. Piviusup tamakkiisup saqqummernissaa kissaatigaarput, taamak Jens Zinglersen BBC-mit septembarimi apersorneqarsimasoq oqarpoq.

Kisianni qaartartorsuit sisamaqarsimanerat peqatigiiffissi sumut atorsinnaagamiuk?

- Qaartartorsuaq manngertornippat imaluunniit arlaatigut alissimassappat qinngornernik radioaktiviusunik mingutsitsineq sakkortooq uani pineqarpoq. Taamaassappallu qallunaanut kalaallinullu sakkutooqarfimmi Pituffimmi sulisunut sunngiuneqartussaavoq, minnerunngitsumilli aamma kalaallit nunaata avannaani innuttaasunut, Jens Zinglersen oqarpoq.

Taassuma danskit naalagaaffiata suliamik tamatuminnga ukiorpassuarni matooriniartarsimanerat avoqqaaraa.

Videot saliinermeersut allallu BBC-p nittartagaani takuneqarsinnaapput, uani: http://news.bbc.co.uk/2/hi/europe/7720049.stm

Powered by Labrador CMS