Paasissutissat pisoqqat
Timmisartup nakkarnera pillugu BBC-mi nutaarsiassaq naalakkersuisunit ilisimaneqareersoq, nunannut allanut naalakkersuisoq Per Berthelsen ilisimatitsivoq.
Erseqqissaatigaa ukiorpaalunngortuni suliaq tamanna oqaluuserineqangaatsiarsimasoq ilisimaneqarsimavorlu timmisartup nakkarnerani qaartartut sisamaasimasut. Aamma Amerikarmiut nakkarfimmi immap naqqanik aqqartartumik ujaasillutik misissuisarsimanerat nutaarsiassaanngilaq.
- Suliaq tamanna tamanut ammasumik Københavnimi 1995-imi Thule-mut tunngasumik tusarniaanermi aamma DUPI-p nalunaarusiaani ”Kalaallit Nunaat sorsunnerup nillertup nalaani” 1997-imi saqqummersurmi ilisimatitsissutigineqarsimavoq, Per Berthelsen allappoq.
- Naalakkersuisut suliaq soorunami pingaartilluinnarpaat paasissutissanillu nutaanik ilisimaneqanngitsunik takkuttoqassagaluarpat apeqqutit takkukkumaartussat Danmarkimi naalakkersuisunut Amerikarmiunullu qaqitsivigineqassapput. Massakkorpiarli paasissutissanik ilisimariinngisatsinnik nutaanik takkuttoqarsimanngilaq, Per Berthelsen oqarpoq.
Eseqqissaatigaattaaq timmisartup nakkarfiata nalaani avatangiisit tamaanilu innuttaasut peqqissusaat Kalaallit Nunaata Danmarkillu ataavartumik misissuiffigisarpaat.