Risø: Thulemi radioaktivimik mingutsitsisoqarpoq
Avatangiisit qinngornernik ulorianartunik mingutsinneqarsimanissaannik Risømi misissuisarfiup paasivaa Pituffiup eqqaani nunami mingutsitsisoqarsimasoq.
Siorna aasakkut Pituffimmi avatangiisit pillugit nutaamik misissuisoqarpoq, siornatigut misissuiffigineqarsimanngisaannartumik, tamatumuunakkut nuna misissuiffigineqarluni.
Risømi qinngornernik ulorianartunik misissuisarfiup immikkoortortaqarfiani sulisoq Sven Nielsenip KNR-ip radioaviisianut oqarpoq:
- 2003-mi Pituffiup nunataa, ukiorpassuarni misissuiffigineqarsimanngitsoq misissuiffigigatsigu plutoniumimik mingutsinneqartoq paasinarsivoq. Taamaammat siorna aasaq mannalu misissuivugut, tamanna inuit uumasullu peqqissusaannut qanoq ajoqusiisinnaatiginersoq paasiniarlugu.
- Misissuinerni nutaani paasisat oqaaseqarfiginissaat maanna siusippaallaaqaaq. Taamaattorli maanna oqaatigereersinnaavara nunami mingutsitsisoqarsimanera paasivarput aamma paasisatta ilaat tupaallaatigaavut. Kisianni annerusumik iliuuseqartoqassanersoq, misissuineq aappaagu naammassereerpat aatsaat oqaaseqarfigisinnaavarput, Sven Nielsen naggasiivoq.