Qaartartoq naviananngilaq
Qaartartoq Thulep kangerluata imartaata naqqaniinneragaasoq navianartorsiortitsinngitsoq immikkut ilisimasalik oqarpoq.
Sven Poul Nielsen qinngornernut immikkut ilisimasalik Risømilu Radiologi pillugu Ilisimatusarnermi "Nationallaboratoriet ofr Bæredygtig Energi"-mi pisortaasoq Jyllandspostenimi oqaaseqaateqartuuvoq.
- Ilumut immap naqqaniinnersoq ilisimanngilarput, taamalu oqallinneq una soqutiginaateqarnersoq, jp.dk-mut oqarpoq, nangillunilu:
- Kisianni tassaniikkuni immallu naqqaniilluni imatut avatangiisinut annertunerusumik navianartorsiutitut isiginngilara.
- Qaartartoq qularnanngitsumik immap naqqaniiginnarpoq taamalu navianaataanani. Aamma plutoniumi qaartartup sananeqaatigisaa qinngornernik aniatitsinngilaq, immikkut ilsimasalik oqaluttuarpoq, nangillunilu nassuiarpaa timmisartorsuup ajutoornerata kinguninngua amerikamiut aqqartartoq atomimik qaartartorsuarmik ujaasiartortillugu Thulep kangerluanukartissimagaat - kisianni nassaarisimanngilaat.
Immikkut ilisimasallip aamma qaartartoqarsimappat qaartoqarsinnaaneranut navianaateqanngitsoq oqaatigaa.
- Sumi arlaanni atomik qaartartorsuaqarsinnaaneranik eqqarsaateqaraanni pitsaasuunngilaq. Kisianni timmisartoq nakkarmat qaarteriaannanngortinneqarsimanngilaq, taamaattumik qaarsinnaanera ilimanaateqanngilaq, oqarpoq nangillunilu:
- Aammami ukiuni 40-ni immap naqqaneereersimavoq - taamaattumik navianaat suli ilimanannginnerulersippaa.
Qaartartoq arlaanni nassaarineqariataassagaluarpat siunertanut pitsaasunut atorneqarsinnaajunnarsivoq, Sven Poul Nielsen oqarpoq.
- Eqqarsaatigisinnaavara amerikamiut aallaqqaammut qaartartoq utertissagaat. Tamatuma kingorna atomip nukinganik nukissiorfimmi nukissiuutitut atorneqarsinnaajunnarsissaaq.