Kalaallit eqqumiitsuliaat akitsorterunneqalersut
Katersisartup kinaassutsiminik isertuussisup kalaallit eqqumiitsuliaannik assissaqanngitsunik katersaatini akitsorterussisarfimmi akitsorterunniarpai. eqqumiitsuliat hundredelikkaat ukiut 57-it ingerlaneranni katersorneqarsimapput.
Sjællandip avannaaniittoq Hørsholm arfininngorpat inunnit kalaallit eqqumiitsuliaannik nuannarisaqarluartunit ornigarluarneqassaaq. Tassanimi eqqumiitsulianik katersugaaterpassuit grønlandicamik taaneqarsimasut Hørsholmimi akitsorterussisarfimmi Auktionshuset-imi nalunaaqutaq 12 akitsorterunneqassapput.
- Inuit ilaatigut Canadameersut, Tysklandimeersut Frankrigimeersullu ornigutissapput. Inuinnaat, eqqumiitsulianik tuniniaasartut katersugaasiviillu katersukkanik taakkuninnga soqutiginnittuupput, Ole Steen Christensen Auktionshuset-imik piginnittuusoq oqarpoq.
Akitsorterussinermi normut 254-iusut taakkunannga amerlanersaat qiperugaasut katillugit nalinga 809.000 koruuninik akeqartinneqarput. Uanilu "Mianersortumik naliniineq" pineartoq Ole Christensenip oqaatigaa.
- Isumaqarpunga ilaanni tupaallatitsisoqarsinnaassasoq, Ole oqarpoq.
Katersugaatit ilaatigut tassaapput tupilaat, ukkusissamik qiperukkat, kiinarpaat qalipakkallu. Tupilak tassaavoq kalaallit angakkuisa akeqqaminnut sakkutut atortarsimasaat. Tupilaq ukkusissamit imaluunniit uumasut assigiinngitsut saarnginik - ilaannilu inuup saarnganik - sanaajusarpoq.
Katalogini normut akisunersaannut ilaavoq Glob-imit qalipagaq 1934-imeersoq "Ellap Qeqertaata qulaani qaammat", 25.000 koruuninut nalilerneqarsimasoq. Umiap assinga ataaseq 7500 koruuninut nalilerneqrsimavoq. Tunumiit kiinarpaaterpassuit akornanniittut Ittoqqortoormiineersut marluk - angut arnarlu - 10.000 koruuninut nalilerneqarsimapput.
Tuniniaasoq Kalaallit Nunaanni piffissani assigiinngitsuni najugaqartarsimavoq, katersaaterpassuanilu 1950-imiit 2007-ip tungaanut katersugarisimallugit.
Katersugaatit tamaasa tallimanngornermit nalunaaqutaq 10-miit 19-imut arfininngornermilu nal. 10-miit 12-imut takuneqarsinnaapput.