Nanortalimmi tuberkulose
Nanortalimmi innuttaasut ataasinngornermi tuberkulosemut misissortissapput. Innuttaasut tamarmik 15-it sinnerlugit ukioqartut tuberkulosemut qinnguartartikkiartoqquneqarput.
Nanortalimmi innuttaasut tamarmik 15-it sinnerlugit ukioqartut Peqqinnissakkut Nakkutilliisoqarfimmit kajumissaarneqarput tuberkulosemut qinnguartartinnikkut misissortikkiartoqqullugit.
- Pingaarpoq misissortinnissat, aamma nappaatip ilisarnaataanik malussarsimanngikkaluaruit, Peqqinnissakkut Nakkutilliisoqarfik tusagassiutinut nalunaarummini allappoq.
Ukiut kingulliit tallimat ukiumut 78-it tuberkulosemik nappaateqartut paasineqartarpoq, taamaalilluni Nunarput nunanut allanut ineriartorfiusunut arlalinnut nallersuunneqarsinnaavoq.
Nanortalimmi innuttaasut TB-mut misissortinnissaat pissaaq novemberip ulluisa 17-anniit 28-at ilanngullugu. Nalunaaqutaq qassinut pissanersoq illoqarfimmi nivinngaavinni nalunaarutigineqarumaarpoq.
Naartusut meeqqallu 15-it inorlugit ukiullit qinnguartartissanngillat, illillu ukiut kingulliit marluk ingerlaneranni puannik qinnguartartissimaguit tuberkuloseqarninnillu malunnartoqanngippat taava missortittariaqanngilatit.
- Atuartut klassini aalajangersimasuniittut aaversinnikkut misissortissapput atuarfillu aqqutigalugu misissortikkiartoqquneqarumaarput. Meeqqat mikinerit pisariaqarnera naapertorlugu misissorneqarumaarput, Peqqinnissakkut Nakkutilliisoqarfik ilisimatitsivoq.