Air Greenlandip Nuummiit timmisartornissat tamaasa unitsippai
Sakkortuumik anorlernerata Nuullu eqqaani sakkortuumik anoraasuasarnerata Air Greenlandip ataasinngornerup sinneranut timmisartuussinissaagaluit tamaasa unitsippai.
Silasiortut naatsorsuutigaat anori aatsaat marlunngornermi ullaap-tungaani aatsaat sakkukilliartulissasoq, taamaattumik timmisartuutileqatigiit aqagu ullaakkut timmisartuussinissat siulliit tamaasa kinguartereerpai, aallartussaq siulleq nal. 9.30 aallartussanngorlugu.
Ataasinngornermi ullaap-tungaani timmisartuutileqatigiit Airbusiat ”Norsaq” Keflaviki aqqusaallugu Københavnimut utiinnartariaqarsimavoq, Kangerlussuarmi mittarfik miffigissallugu quassappallaarsimammat.
Taarsiullug timmisartuutileqatigiit Boingiat ”Kunuunnguaq” aqagu marlunngornermi immikkut ittumik timmitinniarneqarpoq, Københavnimiit danskit nalunaaqutaannut 10 aallartussanngorlugu, taavalu Kangerlussuarmiit kalaallit nalunaaqutaannut nal. 13.20 Københavnimut utertussanngorlugu.
Ilaasut sapinngisamik amerlanerpaat marlunngornermi apuuffissaannut apuunniarniarlugit aqagu aamma nunap iluani immikkut ittumik timmisartuussinerit amerlineqarniarneqarput.
Marlunngornermi Kulusumut timmisartuussinissaagaluaq pingasunngornermut kinguartinneqarpoq.
Air Greenland angallannikkut ajornartorsiutit ajornartorsiutigiinnarnagit aamma allatigut attaveqaatitigut ajornartorsiuteqarpoq. Tekst-tv suli iluarsinngilaq aamma www.airgreenland.gl-imi tikiffissat/aallarfissat ingerlaavartumik nutartertarfiat suli ajorpoq.
Kisianni timmisartuutileqatigiit ilaasut eqqorneqarsimasut ssapinngisamik pitsaanerpaamik kiffartuunniarpai, taamalu aamma allannguutit pillugit nittartakkami ”nutaarsiassat” ataanni paasissutissiisarniarluni.