Anorersuarnera Air Greenlandimut suli akornusiivoq
Air Greenlandip ilaasuni apuunniarlugit silarluk suli aporfigiuarpaa.
Airbusip ataasinngornermi Københavnimut utiinnartariaqarsimanera peqqutigalugu ullumikkut marlunngornermi timmisartut marluk atlantikoq qulaallugu ingerlaarput.
Airbusi Norsaq Kangerlussuarmiit pisarneq malillugu aallassaaq, kisianni ilaasut ippassaq ilaasussaasimagaluartut ilaasoralugit. Marlunngornermi Københavnip tungaanut ilaasussat Boeing Kunuunnguamut unnugu marlunngornermi kalaallit nunaata nalunaaqutaa naapertorlugu nal. 19.20 aallassapput.
Silasiortut Nuup eqqaani suli sakkortuumik anorlernissaa anoraasuasarnissaalu oqaatigaat, taamaammat ullaap-tungaani timmisartuussinissaagaluit taamaatiinnarneqarsimapput. Air Greenlandilli ilaasussat Danmarkiliartussat ullumikkut kingusinnerusukkut Kangerlussualiaassinnaanissaat naatsorsuutigaa.
Nuup Narsarsuullu akornanni timmisartuussinissat pingasunngornermut nuutinneqarput, pingasunngornermilu Kulusumut timmisartuussinissaagaluaq sisamanngornermut kinguartinneqarpoq.
marlunngornermi timmisartuussinissat maannamuugallartoq Ilulissaniit, Aasianniit Qaarsuniillu ingerlanneqassapput, Kangerlussuup Sisimiullu akornanni timmisartuussinissat ingerlanniarneqassallutik, kisianni taakkunani GLV-mi atortunik amigaateqarneq peqqutigalugu mittarfiit quassassinnaanera taamaatitsinermik kinguneqarsinnaassalluni.