Ilisimatusarfimmi rektori nutaaq
PhD. Tine Pars Kalaallit Nunaanni ilisimatuunngorniarfimmi Ilisimatusarfimmi 2009-mi januaarip aallaqqaataaniit nutaamik rektorinngussaaq. 41-nik ukioqarpoq, KNI A/S-imi HR-chefitut atorfeqarluni nuussalluni.
Siulersuisut Tine Parsip rektoritut atorfinitsinneqarnissaa aalajangiuppaat, inerlatseriaaseq ilaatigut siunnersuinermut ataatsimiitsitaliaq ilinniartunit, teknikkikkut allaffissornikkullu sulisuusunik aammalu ilisimatusarfiup ilinniarnertuunngorniarfiini ilinniartitsisunik ilisimatusartunillu inuttaqartoq siulersuisunut inassuteqarnissamut periarfissinneqareersullu.
Ilisimatusarfimmi siulersuisut Tine Parsimik toqqaanerminni aqutsisinnaanermut ilisimatusarsimanissamullu misilittagaqarsimanissamut piumasaqaatit saniisigut Tinep attaveqarsinnaanermut misilittagai uppernarsaatitaqartut pingaartissimavaat, piffissami aggersumi sulisunut, ilinniartunut innuttaasunullu attaveqarsinnaanissamut annertuumik piginnaasaqarluarnissamik piumasaqaatitaqartussaassammat.
Tine Parsip rektor Aage Rydstrøm Poulsen kingoraassavaa.