Namminersornermik taasisitsineq Sermitsiaq.gl-imi malinnaavigineqarsinnaavoq
Atuartartut taasinerup unnukkuani taasinermik kisitsineq Sermitsiaq.gl-imi malinnaavigisinnaavaat.
Lagkagimi takuneqarsinnaassaaq marlunngornermi novemberip 25-ianni taasinermi kisitsinerup ingerlarnga qanoq innersoq.
Taasinerup inerneri ataavartumik saqqummiunneqartassapput Sermitsiap, Namminersornerullutik?Oqartussat aamma kommuneqarfiit IT-mut immikkoortoqarfiisa Sermit A/S-ip suleqatiginnerisigut.
– Sermit qinersinermut systemia ineriartortinneqarsimavoq taasinernik kisitsinissamut kingornalu kisitsisinik saqqummiussinissamut, tamannalu siusinnerusukkut atorneqarsimavoq ilaatigut 2008-mi aprilimi kommunimut qinersinermi, Sermit A/S quppernermini nittartakkami allappoq.
Paasissutissallu tamakkua novemberip 25-ianni Sermitsiap qupperneranut nittartakkamut toqqaannartumik ingerlateqqinneqartassapput.
Taasinernilli kisitsinerup sukkassusianut apeqqutaalluinnarput sumiiffinni qinersinermut siulersuisut, tamakkua kisitsinerup inerneri Nuummi qinersinermut nakkutilliisoqarfimmut nassiuttassammatigit.
– Neriuutigaarput taasinerup inernerugallagaa unnuap qeqqartinnagu saqqummiussinnaassallugu, Namminersornerullutik?Oqartussani nunap iluanut pissutsinut siulersuisoqarfinnullu immikkoortoqarfik Sermitsiamut oqarpoq.
– Taasisitsineq inatsisartunut kommunalbestyrelsinullu qinersisarnernit ajornaannerussaaq. Qinersiviit matuneranni kisinneqartussat taamaallaat tassaapput angertut, naaggaartut, taasissutit allaffigisimanngitsut atorsinnaasullu amerlassusaat, Namminersornerullutik?Oqartussat nalunaaruteqarput.
Taasinermi inernerit tamanut saqqummiunneqaannavissut takuneqarsinnaassapput.
Ittoqqortoormiini taasinerup inernera siulliulluni saqqummiunneqassaaq, tappanna kitaanit akunnernik marlunnik siulliummat. Suulli tamarmik pisarnertut pissappata Nuummi taasinerup inernera kingullersaalluni saqqummiunneqassaaq - qularnanngitsumik aqqarnup unnuap-qeqqatalu akornanni, Namminersornerullutik?Oqartussat neriuutaat eqquutissappata.
Tamatumunnga atatillugu Sermitsiap quppernera nittartagaq lagkagiliorpoq, tassani takuneqarsinnaassalluni »angertut«, »naaggaartut«, »taasissutit allaffigineqarsimanngitsut« aamma »atorsinnaanngitsut« agguataarnerat takuneqarsinnaassalluni, qinersiviit nalunaaqutaq 20.00 matuppata.
Aamma ullormi taasiffimmi sinerissamit assinik quppernermut nittartakkamut ilisisoqartassaaq.