Arnanik persuttaasarneq akerleralugu FN-ip ullua

Nunatsinni namminersorneq pillugu ulloq taasiviusoq marlunngorneq 25. novembari 2008, aamma ulloq tassaavoq FN-ip arnanik persuttaasarneq akerleralugu illua.

Tamatumunnga atatillugu Nuummi 8. marts-gruppenip malunnartinniarpaat, tamat oqartussaaqataaneranni tunngaviusut naligiinneq kiisalu inuit tamarmik ataqqineqarnissaat apeqqutaatinnagit; suiaassuseq, suminngaannit naggueqarneq, politikkikkut isummat, oqaatsit, upperisaq kiisalu atoqateqartarneq.

Kikkunnut tamanut eqqaamaqquaat arnarpassuit ullut tamaasa persuttarneqartartut, kiisalu meeqqat persuttaanernik isigisaqartartut. Qinnutigaallu arnat meeqqallu persuttartinnermik nalaataqartartut pitsaanerusumik ikiorneqarsinnaanerat illersugaanerarlu pitsaanerussasoq piumasaralugu, taamaalillutik persutaanertaqanngitsumik aamma sapilersitaanertaqanngitsumik inuunertik ingerlateqqinniassammassuk.

– Taasineq qanorluunniit inerneqaraluarpat suli suliassaqaqaabut. Nunami maani arnat aatsaat 1948-mi taasisinnaatitaalerput.

– Namminersorneq pillugu isumaqatigiissutip suliarineqarnera angutinik aqunneqarpoq politikkerit immikkullu ilisimasallit peqataatinneqarsimasut eqqarsaatigalugit. Naligiissitaanermut Ataatsimiititaliap tapiiffigineqartarnera annikereeqisoq suli aamma maannakkorpiaq annikillileqqinneqarpoq.

– Politiit suliaat annertooq tassaavoq angerlarsimaffinni persuttaaneq aamma aqqusinerni persuttaaneq. Juullillu qaamataa ornitarput aamma persuttaanermik tunngasunik amerlasuunik politiinut suliassaqartitsissajunnarsivoq.

– Eqqaamallugu naligiissitaaneq nammineq takkuttanngimmat, kisianni piumasaqaataavoq piviusumik iliuuseqarnissaq, aningaasat aamma politikikkut tarpersersorneqarneq, 8. marts-gruppen tusagassiutitigut nalunaarumminni allapput, neriuutigalugulu 2009 naligiissitaanermik ersersitsiumaartoq kiisalu angerlarsimaffinni persuttaasarneq annikilliumaartoq, inuiaqatigiit meeqqallu ajunngitsumik ingerlanissaat eqqarsaatigalugit.