Qilalukkanik qaqortanik pisassiissutit 29inik sipporneqartut
Kommuneqarfik Upernavimmi qilalukkanik qaqortanik pisassiissutit 29inik sipporsimavaat, Aalisarnermut Piniarnermut Nunalerinermullu Naalakkersuisoqarfiup sakkortunerpaamik erseqqissaatigaa aalajangersakkat malinneqaqqullugit.
Kommuneqarfimmit Upernavimmit oktobarip 23iani nalunaarutigineqarpoq qilalukkanik qaqortanik pisassiissutit 50it naalakkersuisut pisassiiffimmi juulip 1iani 2008miit juunip 30ianut 2009mut pisassiissutaareersut qaavatigut pisassiissutaat 50it tamannerneqarsimasut nalunaarutigineqarpoq, aammalu oktobarip 22iani pisassat qilalukkanik qaqortanik 22nik qipporneqarsimasut.
Aalisarnermut, Piniarnermut Nunalerinermullu Naalakkersuisoqarfiup oktobarip 10ani 2008mi Kommuneqarfik Upernavimmiit qilalukkanik qaqortanik pisassiissutaareersut qaavatigut immikkut pisasseqqinneqarnissamut qinnuteqaat tiguaa, tamannalu pitinnagu kommunemiit nalunaarutigineqarpoq, piniarneq unitsinneqartoq, pisat kisinneqassammata.
Naalakkersuisut Kommuneqarfik Upernavimmut ukiumi pisassiiffiusumi 2008mi juulip 1ianiit 2009mi juunip 30ianut qilalukkanik qaqortanik pisassiissutit 50inik ilaneqarnissaat aalajangerpaat, taamaalilluni Kommuneqarfik Upernavimmut pisassiissutit katillugit 106inngorlutik, Kalaallit Nunaallu tamakkerlugu qilalukkat qaqortartassat katillutik 250inngorlutik.
Naalakkersuisoqarfiup sakkortunerpaamik erseqqissaatigaa, kommunit tamarmik, taakku kattuffiata peqatigiiffiisaluunniit naalakkersuisut nunap pisuussutaanut uumassusilinnut pisassiissutitut aalajangersagaat malissallugit akisussaaqataasut. Kalaallit Nunaanni piniarnermut aalisarnermullu nakkutilliisut ilaatigut suliassaraatinatsisartut inatsisaanni nalunaarutaannilu aalajangersakkat naapertorlugit pisanik piniarnermillu nakkutilliinissaq misissuinissalu.
– Nakkutiliilluni suliaq taanna assorujussuaq pingaaruteqarpoq, aammalu piniarnermik aalisarnermillu inuussutissarsiuteqartunit tamanit ataqqineqartariaqarluni, Naalakkersuisoqarfik tusagssiorfinnut nalunaarummi allappoq.
Qilalukkat pisassiissutit sipporlugit pisarineqarsimasut siunissami Kommuneqarfik Upernavimmut pisassiissutissaajunaartunit ilanngaatigineqarumaarput, pisassiissutinik agguaariaaseq naapertorlugu.