Timmisartut qangattartalerput
Ilaasut Danmarkiliartussat tamarmik ippassarli Nuummiit ingerlaqqissinnaajunnaaqqasut maanna tamarmik aallarput.
Nuummi Maniitsumilu ulluni kingullerni silarlunnera Air Greenlandip timmisartuussisarnermut immikkoortortaqarfianut assut unamminartorsiortitsisimavoq, tassanngaaniit timmisartuussinerit tamarmik aqunneqarlutillu tulleriissaarneqartaramik.
Ullumi marlunngornermi ualilluarnissaata tungaanut Danmarkiliartussat ilaat ippassarli ingerlaqqissinnaajunnaaqqasut ullumikkut aamma Københavniliarnissaat ilimanarunnaaraluarpoq, kisianni ualimut noqqillaaminiariartoq sulilluarnikkut ilaasut tamaasa Kangerlussuarmut timmisartuunneqarput, taamaalillutik atlantikoq qulaallugu timmisartuussisussamut kinguartinneqarsimasumut GL782imut nal. 17.30ip missaani Københavnimut aallartumut ilaallutik.
Maanna Nuummiipput ilaasussat Kalaallit Nunaata avannaanukartussat inuit 35it missaanniittut. Tamakku unnugu nal. 21.30 Kangerlussualiaanneqassapput, taamalu aqagu ullup ingerlanerani kingusinnerpaamillu sisamanngorpat apuuffissaannut apuunniarneqassapput, naak timmisartut timmisartumilu inuttat amigaatigineqaraluartut.
Ilaasut Maniitsuliartussat tassanngaaniillu aallartussanut tunngatillugu aqagu pingasunngornermi immikkut ittumik timmisartuussinerit marluk aallartinniarneqarput. Air Greenlandip Super King Airianik ingerlanniarneqarput, Nuummiit siulleq nal. 7.15 aallassalluni, aqqut Nuuk-Maniitsoq-Kangerlussuaq-Maniitsoq-Nuuk marloriarlugu ingerlaffigineqassalluni.
Ullumikkut GL415/GL416 Nuuo Narsarsuullu akornanni timmisartuussinissat taamaatiinnarneqarput, ingerlaarfissaq taanna aqagu pingasunngornermi ingerlaarneqassaaq.
Ippassaq ataasinngornermi timmisartuussinissat sineriaq tamakkiusarlugu ingerlasussat GL488/GL489 taamaatiinnarneqarput, aamma timmisartutigut inuttassatigullun ajornartorsiorneq peqqutigalugu timmisartuussinissat taakku sisamanngormat ualikkut aatsaat ingerlanneqarsinnaassapput.