Siulittaasoq akiliussivoq
Nuna tamakkerlugu assammik arsarnermi K-33p arnartai peqataaqqilerput.
K-33-ip arnatai inersimasut assammik arsartartut ukiut tallimat ingerlanerani kiisami peqataaqqissapput. »Tungujortut« Qaqortumeersut arnat Faxe Cup-ernissaat oktoberip 28-ianniit novemberip aappaannut ingerlanneqalerpat peqataaqqissapput.
Peqataaqqittussat marluusussaapput, aamma Nagdlúguaq Ilulissaneersoq arnanik inersimasunik peqataatitseqqissammat.
Faxe Cup-imi peqataasussat allat tassaapput Nuuk Byhold, NÛK kiisalu GSS Nuummeersoq.
– Sungiusarnerni kingullerni marlunni holdinik pingasunik sungiusartoqartarnikuuvoq. Taamaattumillu Faxe Cup-imut peqataanissaq uanga soqutiginninnerup attatiinnarnissaanut piungaaruteqartutut isigaara, Jens Peter Kielsen, suliffeqarfimmi namminersortumik »Sanasoq namminersortumik« piginnittuusoq oqarpoq.
– Taamaattumik uanga K-33-ip arnartai aningaasaliiffigiumallersimavakka, tamannalu 75.000 kroninik akeqassaaq, taama Jens Peter Kielsen oqarpoq.
Annerusumik atuarsinnaavutit Sermitsiami tallimanngornermi saqqummersumi.