Grønlandsbanken ajornartorsiortoqaraluartoq ingerlaluarpoq

Grønlandsbanken ajornartorsiortoqaraluartoq ukiq manna 1.-3.kvartalimi akileraarutit suli peernagit 62,3 millioninik inerneqarpoq, 2007imi taamaanilerani 88,8 millioniusimallutik. Akileraarutit peereernagit inernerata appariarnera annermik bankip aktianik obligatuioninillu uninngasuutaasa nalingisa nalimmassarneqarnerat minusiusoq peqqutaavoq. Tamanna bankip Københavnimi Børsenimut kvartalikkaartumik nalunaarutaani erserpoq.

Ajornartorsiortoqaraluartoq Gtønlandsbankip tunngaviusumik isertitai 5,9 procentimik qaffassimapput, aningaasartuutit taamaatiinnakkallu 6,7 procentinik qaffassimallutik. Aaqqiineq sioqqullugu 1. - 3. kvartalimi tunngaviusumik isertitat 4,9 millioninik qaffallutik 97,5 millioner koruuniupput.

Bankip aktianik obligationinillu tigumiaata nalingisa nalimmassarnerini minusiusut tigumiiaatinik isertitat 2008mi 1. - 3. kvartalimi minus 33,2 millioner koruuninik inerneqarpoq, 2007imi piffissami tassani minus 9,7 millioniusimallutik.

Bankip pappiaqqanik nalilinnik tigummisai nunarsuarmi aningaasanik niuernermit sakkortuumik sunnerneqarsimavoq. Grønlandsbankip ukup affaani siullermi bankip aktianik obligationinillu tigummisani ikilisarsimavai, taamaalilluni erniat qaffassinaanerannut navianaat appartillugu.

Bankip attartortittakkani 2 millioner koruunit inulaarlugit appartissimavai, 2007imi piffissap tamaanilerani 5,9 millioninik qaffatsissimallugit. Appartitsinerup annertussusia suli annikitsuinnaavoq.

Appartitsinerit Kalaallit Nunaannut atuumassuteqartuinnaapput.

Siusinnerusukkut oqaatigineqareersutut Grønlandsbanken aningaaseriviit 132it allat peqatigalugit Naalagaaffimit qularnaveeqqusigaanermut ilaavoq. Aaqqissuussineq taanna 2008mi kvartalit sisamaanni aningaasartuutinik 3 millioner koruuninik naleqarpoq.

Aningaasanik niuernikkut ajornartorsiorneq peqqutigalugu Grønlandsbankip ukiumut ataatsimut isigalugu tunngaviusumik isertitani 2007imut naleqqiullugu 5 procentimik qaffasinnerunissaat naatsorsuutigaa, siusinnerusukkut 10 procentit naatsorsuutigineqarsimagaluarlutik. Bankip attartortittagaasa appartinneqarnerannut inissisimaneq suli appasippoq.

Bankip pappiaqqanik nalilinnik tigummisaasa nalingisa malunnartumik appariarnerat isigalugu aningaasanillu niuernikkut ajornartorsiorneq suli nalorninartoqartillugu akileraarutit peereernagit inernissaa 2007imut sanilliullugu ataatsimut isigalugu 30 procentimik appasinnerussangatinneqarpoq.

Ukiup inernissaanut missingersuummi uani bankip ilisimatitsissutigaa, septembarip 30iata kingorna aktiat oblogationillu nalingisigut annaasassaasinnaasut piuviusunngortinneqanngitsut 11 millioner koruunit missaanniittut sillimaffigineqareersimasut.

Grønlandsbankip tigoriaannarnik aningaasaatai suli ajunngilluinnarpoq indlån-imit sinneqartooruteqarluarluni inatsisitigullu piumasaqaatinut tunngatillugu tigoriaannarnik aningaasaateqarneq 142,3mik qaavatigut matussutissaqarluni. Nunarsuarmi aningaasanik niuernermi ajornartorsiuteqarneq isigissagaanni bankip siulersuisuisa nalilerpaat tunngaviusumik isertitat naammaginartut.