Nattoralik toqungasoq arnaviaq utoqqaavoq

Nattoralik toqungasoq Kalaallit Nunaanni Pinngortitaleriffimmut nassiunneqarsimasoq suluisa nuuiniit nuuinut 2,42 miuvoq, taannalu kalallit nunaata nattoraliini rekordimut 2,45sumut qanittuararsuuvoq.

Nattoralinni arnavissat anginerpaasarmata una arnaviaasoq qularutissaanngilaq. Nattoralik toqungasoq Berit Olesen Vangimit Qussummi Nuummiit 60 kminik avannarpasinnerusumiittumi nassaarineqarsimavoq.

Kalaallit Nunaata nattoralia agguaqatigiisillugu nattoralinnit taamaattunit annerugajuppoq, Europap avannaaniit Ruslandip kangiani Kamtjatkamut siammarsimasuullutik. Nattoralik tunniunneqartoq ima angitigaat, angissusaannaatigut arnaviaasoq oqaatigineqarsinnaalluni. Timmiaq utoqqaavoq, kisianni sumik toqquteqarsimanera nalunarpoq. Nattoralik timaatigut innarlersimasunganngilaq, kisianni toqunartortorsimanermit toqquteqarsimasinnaavoq.

Piniarnermut nakkutilliisoq Magnus Petersen Paamiuneersoq innuttaasut ilaannik oktobarip 28iani kalerrinneqarnermi kingorna Paamiut eqqaanni nattoralimmik nassaarpoq. Nattoralik inuusuttoq tingisinnaasimanngilaq, sulualu napisimasoq paasineqarmat toquttariaqarsimavoq. Nattoralik taanna Pinngortitaleriffimmut aamma nassiunneqarpoq.

Timmiaq toqungasoq piniaqqusaanngitsorlu nassaarineqarpat Timmissat pillugit nalunaarut naapertorlugu pinngortitami qimmaannarneqanngippat Kalaallit Nunaanni Pinngortitaleriffimmut nassiunneqassaaq. Timmiaq nammineq pissatut kiffiortillugu tigummiinnaqqusaanngilaq. Pinngortitaleriffiup timmissat kiisortut aamma nassaarineqarnerminni nutaajunngikkaluartut tigusarpai, suna toqqutigisimaneraat amerlanertigut paasineqartarmata.

Nattorallit, kissaviarsuit kiinaaleeqqallu arlallit ukiut tamaasa Pinngortitaleriffimmut nassiunneqartarput. Timmissat kiisortut inuttulli nerisaqaqatigiiffimmi qullersatut inissisimapput, taamaattullu nersutinik avatangiisiniinngitsunik akuneqarsimasunik nerisimappata taakku nattorallip timaani katersuutilersimasinnaapput, taamalu kinguaassiorsinnaanikillisinnaalluniluunniit toqusinnaalluni. Taamaattumik timmissat kiisortut toqqutaat paasiniassallugit pingaartuuvoq.

Siusinnerusukkut nattoralinnik 12inik Kalaallit Nunaanni 1997ip 2000illu akornanni nassaarineqarsimasunik misissuisoqarsimavoq, taakkunannga marluk aqeerlup toqunartuanik toqquteqarsimasut paasineqarpoq. Nattorallit tunniunneqarsimasut akornanni ataaseq timmiarsiummik aallaaneqarsimalluni ikinnerpaamik 69inik aqerlutaqarsimavoq. Nattorallit Kalaallit Nunaanni 1973imiilli eqqissisimatitaalluinnarsimapput.

Powered by Labrador CMS