SANA matusariaqalersinnaavoq
Aningaasaqarnikkut missingersuusiat milionilikkaanik sipporneqarsimapput, peqqissaasut qaangeruminaatsumik amigaataapput, uninngavillu immikkoortoq ataaseq matulluni, knr.gl allappoq.
Dronning Ingridip Napparsimmavissua Nuummiittoq politikkikkut pilertortumik iliuuseqartoqanngippat ungasippallaanngitsukkut matusariaqalersinnaavoq.Taamak ilungersunartigisumik peqqissaasut kattuffiata siulittaasua Karin Holler aamma Sundhedskartellemi siulittaasuusup napparsimmavissuarmi pissutsit paatsiveqanngiusattumik inissisimasut nalilerpai.
- Aningaasaqarnikkut missingersuusiat millionilikkaanik sipporneqartut, peqqissaasunik nakorsanillu qaangeruminaatsumik amigaateqarnerup napparsimmavissuarmi immikkoortortaq ataaseq matutittariaqarsimavaa. Imaappoq napparsimmavissuarmi ullumikkut napparsimasut pisariaqavissumik passunneqartariaqartut kisiisa tiguneqarsinnaasut taamalu aamma suliaritinnissamut utaqqisut allattorsimaffiat takisoorujussuanngorluni, Karin Holler oqarpoq.
- Napparsimmavissuani aqutsisut kingullertigut aalajangerpaat Danmarkimi bureaunit namminersortuneersunik peqqissaasunik taartaagallartartunik tiguseqqittoqassanngitsoq. Tamatuma kingunerisaanik peqqissaasut aalangersimasunik suliffeqartut marloriaammik ulapinnerulissappupt. Taamatut suleriaaseqarneq piffissami sivisuumi atasinnaanngilaq. Ajalusuussaaq, uninngasut naggataagut peqqissaasunit isumagineqarsinnaajunnaarlutik.
Peqqissaasut ikinnerpaamik 25it maannakkorpiaq amigaatigineqarput, tassani peqqissaasut aalajangersimasumik atorfillit napparsimasunut peqqissartunut immikkoortortaqarfinnut utersimalerlutik.
– Politikerit aalajangertariaqarput Kalaallit Nunaanni peqqinnissaqarfik innuttaasunit pigineqartoq ingerlatiinnarumanerlugu, imatut ukiuni arlaqalersuni peqqissaasunik taartaasartunik aalajangersimasuni namminersortuneersunik atorfinitsitsisarnerit ingerlatiinnarnagit. Ullumikkut peqqinnissaqarfimmi peqqissaasutut atorfillit 20 procentii peqqissaasuupput namminersortunit atorfinitsinneqarsimasut.
– Paasinnittaasera naapertorlugu peqqinnissaqarfik pisortat susassaqarfigaat. Taamaattuaannartariaqarporlu, Karin Holler oqarpoq.