Avisit isornartorsiuinerusarput

Nunatsinni aviisit KNR-imit isornartorsiuinerusartut, Københavnip Universitetiani eskimologi-mik ilinniartup misissuinerani erserpoq, knr.gl taama allappoq.

Nunatsinni tusagassiutit Københavnip Universitetiani eskimolog-imik ilinniartup misissoqqammerpai. Tusagassiutini ineqarnermut suliaq qanoq suliarineqarsimanersoq misissuinermi aallaaviuvoq misissuinermilu paasineqarpoq aviisit qanimut misissuinerusartut KNR-imut naleqqiullutik.

Eskimologi-mik ilinniartoq Karina Fleischer misissuisuuvoq.

- Aviisit oqaatsinik sakkortuinerusunik atuisarput. Oqaatsit soorlu makku atortarpaat: ”merianngunaq” aamma ”ulluinnarsuaq tillinniarneq”, qulequtsersuinermilu Qanoruumi oqaatsit sakkukinnerusut atorneqartarput. Inuinnik tamanik kiffartuussiviunera aningaasaliiffigineqartarneralu tamatumunnga peqqutaasinnaapput, Karina Fleischer knr.gl-imut taama oqarpoq.

Aviisit AG aamma Sermitsiaq allatut aningaasaqarlutik ingerlanneqarput.

- Aviisit pisiarineqartarnertik ingerlaannarnissaminnut tunngavigisarpaat, paarlattuanik KNR-mi oqaatsinik taama sakkortutigisunik qulequtsersuinermi aningaasaqarnertik eqqorneqaratarsinnammat tunuarsimaarnerusartut malunnarpoq, Karina Fleischer taama oqarpoq.

Kinaassutsimik isertuussilluni nunatsinni tusagassiutitigut oqaaseqartitsisarneq atuuttorujussuusoq allaaserisami aamma sammineqarpoq.

- Kikkut tamat oqartussaatitaanerat naalakkersuinermik suliaqartunit arlalitsigut killilersimaartinneqartarmat kinaassutsimik isertuussilluni tusagassiutitigut oqaaseqartarnerup aallavigisaraa oqarusuppunga. Inuit pisortat suliffeqarfiutaanni atorfillit soraarsinneqarnissaminnik siorasaarneqartartut siornatigut takussaasarpoq. Tamannalu kikkut tamat oqartussaatitaanerata killilersimaarneqarneranut ersiutaavoq, Karina Fleischer taama oqarpoq.

Powered by Labrador CMS